جموں و کشمیر کے ضلع رامبن کے سب ڈویژن بانہال میں ایک سڑک حادثہ میں تین افراد زخمی ہو گئے ہیں جن میں دو کی حالت تشویشناک بتائی جا رہی ہے اور انہیں میڈیکل کالج و ہسپتال اننت ناگ منتقل کر دیا گیا ہے۔
پولیس ذرائع کے مطابق تین افراد موٹر سائیکل پر سوار تھے جو قومی شاہراہ تحصیل دفتر بانہال کے قریب حادثہ کا شکار ہو گئے جس کے نتیجہ میں تین افراد زخمی ہو گئے۔
مقامی رضاکاروں اور پولیس نے زخمیوں کو سب ڈسٹرکٹ ہسپتال بانہال منتقل کیا جہاں ڈاکٹروں نے دو شدید زخمیوں کو گورنمٹ میڈیکل کالج و ہسپتال اننت ناگ منتقل کر دیا ہے۔
زخمیوں کی شناخت عبدالرشید گوجر ساکنہ شابنباس بانہال، جنید احمد اور عاقب احمد ساکنان کراوہ بانہال کے طور ہوئی ہے۔ عاقب کا بانہال ہسپتال میں علاج چل رہا ہے جبکہ دو اننت ناگ منتقل کر دیے گئے ہیں۔
بانہال پولیس نے معاملہ درج کر کے تحقیقات شروع کردی ہے۔
