راجوری: سرحدی ضلع راجوری کے لائن آف کنٹرول کے نزدیک ایک فوجی ایمبولنس حادثہ کا شکار ہوگئی جس میں دو فوجی جوان ہلاک ہوگئے۔ سرکاری ذرائع نے بتایا کہ ہفتہ کے روز راجوری کے ڈنگنن نالہ کے نزدیک ایک ڈونگی گالا علاقے میں لائن آف کنٹرول کے نزدیک ایک فوجی ایمبولنس ڈرائیور کے قابو سے باہر ہوکر200 فٹ گہری کھائی میں جاگری۔ اس حادثہ میں ایمبولنس کا ڈرائیور اور ایک فوجی جوان شدید زخمی ہوگیا، جنہیں علاج کے لیے فوجی ہسپتال راجوری منتقل کیا گیا۔ تاہم دوران علاج دونوں فوجی اہلکار جانبر نہ ہوسکے۔ مہلوک فوجی جوانوں کی شناخت بہار کے حوالدار سدھیر کمار اور راجوری کے پرم ویر شرما کے طور پر کی گئی۔ پولیس نے اس سلسلے میں کیس درج کرکے تحقیقات کا آغاز کردیا ہے۔ تمام قانونی لوازمات پورے کرنے کے بعد لاشوں کو اپنے آبائی علاقوں کو روانہ کیا جائے گا جہاں ان کی آخری رسومات ادا کی جائیں گی۔
مزید پڑھیں: Poonch Attack فوجی گاڑی پر حملے کیلئے اسٹیل کوٹڈ گولیاں اور آئی ای ڈیز کا استعمال کیا گیا، دلباغ سنگھ
واضح رہے کہ پونچھ کے باٹھا دوریاں جنگلی علاقے میں 20 اپریل کو ایک فوجی گاڑی میں اچانک آگ لگنے سے پانچ فوجی جوان جھلس کر ہلاک ہوگئے تھے۔ فوج کے بیان کے مطابق عسکریت پسندوں نے ممکنہ طور پر گاڑی پر گرینیڈ سے حملہ کیا جس کی وجہ سے گاڑی میں آگ لگ گئی۔ اس حملے کے بعد فوج نے علاقہ کو محاصرے میں لیا اور تلاشی کارروائیاں شروع کی۔سکیورٹی فورسز نے اس حملے کے بعد تقریباً 200 سے زائد افراد کو پوچھ گچھ کے لیے طلب کیا ہیں جن میں کچھ افراد کو بعد میں رہا بھی کیا گیا۔ اس واردات کی جو ابتدائی فوٹیج سامنے آئی تھی اس میں مقامی جونوانوں کو آگ میں جھلس رہے فوجیوں کو نکالنے کی کوشش کرتے ہوئے دیکھا گیا ۔ حکام نے نیشنل انوسٹی گیشن ایجسنی کی ایک ٹیم کو اس واقعے کی تحقیقات کیلئے پونچھ روانہ کردیا تھا ۔ جس سڑک پر یہ واردات رونما ہوئی اسے تین دن تک عام لوگوں کی آمدو رفت کیلئے بند کردیا گیا تھا۔
