حضرت خواجہ معین الدین چشتی رحمتہ اللہ علیہ کے بڑے صاحبزادے حضرت خواجہ فخرالدین چشتی کا سالانہ عرس 14 مارچ سے جھنڈے کی رسم کے ساتھ شروع ہوا جو 23 مارچ تک جاری رہے گا۔
101 فٹ اونچے بلند دروازے پر عبدالمنان شیخ نے عقیدت مندوں کے ساتھ جھنڈے کی رسم ادا کی۔ اس موقع پر ملک میں امن و امان اور بھارت سے کورونا کے خاتمے کے لیے خصوصی دعا کا اہتمام بھی کیا گیا۔
صوفی، قلندر، پیر ، فقیر عقیدت مندوں نے جھنڈے کی روایت کو برقرار رکھتے ہوئے جلوس نکالا۔ اس میں صوفیانہ قوالی اور ملنگوں کے حیرت انگیز کارنامے دیکھے گئے۔
جھنڈے کی رسم میں مقامی لوگوں کے علاوہ ملک کی دیگر ریاستوں سے آئے زائرین نے بھی شرکت کی اور خواجہ فخرالدین کے مزار پر منتیں، مرادیں اور دعائیں کیں۔
یاد رہے کہ 23 مارچ تک چلنے والے اس عرس میں ملک بھر سے بڑی تعداد میں زائرین شرکت کریں گے۔
درگاہ کے متولی حاجی محمد یوسف خان کے مطابق 15 مارچ تا 23 مارچ تک عرس منایا جائے گا۔ 20 مارچ کو شاہی محفل کے ساتھ کل کی رسم ادا کی جائے گی۔ بڑے کل کی رسم 23 مارچ کو خاص و عام زائرین گلاب پانی، کیوڑے اور عطر سے درگاہ کے احاطے کو مہکا کر ادا کریں گے۔
ضلع انتظامیہ اور پولیس افسران بھی موجود رہیں گے۔ کووڈ کی گائیڈ لائن پر عمل کرتے ہوئے عرس کی تمام رسم ادا کی جائے گی۔
بابا فخرالدین کے عرس میں ہزاروں زائرین اجمیر سے سلواڑ شریف پیدل سفر کرتے ہیں اور اپنی اپنی حیثیت کے مطابق عقیدت مندوں کے لیے جگہ جگہ لنگر کا بھی اہتمام کرتے ہیں۔
