ریاست راجستھان کے دارالحکومت جے پور میں یوم عاشورہ کے موقع پر کوئی بڑا پروگرام منعقد نہیں ہوگا۔ ماہ محرم الحرام کی دسویں تاریخ یعنی یوم عاشورہ والی رات کافی زیادہ پروگراموں کا اہتمام ریاست راجستھان میں کیا جاتا ہے۔ لیکن عالمی وباء کورونا کے خطرے کے مدنظر کسی بھی طرح کا کوئی بڑا پروگرام راجستھان اور دارالحکومت جے پور میں نہیں ہوگا۔ اس بات کا اعلان خود دارالحکومت جے پور میں جو لوگ تعزیہ بناتے ہیں ان کی جانب سے کیا گیا ہے۔ حالانکہ تعزیوں کی زیارت یہاں پر ضرور ہو گی۔
راجستھان پولیس کی جانب سے نوٹس چسپاں کیے گئے ہیں جس میں کہا گیا ہے کہ کورونا گائیڈ لائن کے مدنظر کہیں پر بھی بھیڑ جمع نہیں ہونی چاہیے۔
یوم عاشورہ کے دن تعزیہ نکالا جاتا ہے۔ لیکن پولیس کی جانب سے جاری کردہ نوٹس اور کورونا وباء کا خیال رکھتے ہوئے یہ تمام تعزیہ آج نہیں نکالے جائیں گے۔ اگر بات کی جائے جے پور کی تو یہاں پر 350 کے قریب لائسنس والے تعزیے نکالے جاتے ہیں۔ جن میں 70 کے قریب تعزیہ رام گنج علاقے سے نکلتے ہیں۔
بیرون ملک سے آنے والے ہرفرد کو کورونا ٹیسٹ کرانا ہوگا
تعزیہ بنانے والوں کا کہنا ہے کہ ہمیں امید تھی کہ محرم سے قبل کورونا وباء بھارت سے ختم ہوجائے گا۔ لیکن جس طرح کے حالات ہیں، اس کے مدنظر ہم تمام لوگوں کی جانب سے بھی پولیس کو پہلے ہی یہ بات بتائی گئی تھی کہ ہم تعزیہ کا جلوس نہیں نکالیں گے۔ بہر حال ابھی تمام تعزیوں کی جو روایت ہوتی ہے وہ کس طرح سے منعقد کی جائے گی یہ دیکھنے والی بات ہوگی۔
وہیں محرم کے مدنظر راجستھان کے مسلم اکثریتی علاقوں میں کافی زیادہ تعداد میں پولیس کے جوان تعینات کیے گئے ہیں تاکہ کوئی بھی شخص گائیڈ لائن کی خلاف ورزی نہ کر سکے۔
