نوجوان کی زہریلی دوا کھانے سے موت

ریاست راجستھان کے ضلع بیکانیر کے کھاجو والا تھانہ علاقے میں ایک نوجوان اور ایک لڑکی نے معاشقے کی وجہ سے زہریلی دوا کھالی، جس میں نوجوان کی موت ہوگئی اور لڑکی کی حالت نازک بنی ہوئی ہے۔

تھانہ انچارج وکرم چوہان نے بتایا کہ اطلاع ملی تھی کہ چک 7 کے ایل ڈی میں گاؤں سے کچھ دور ایک نوجوان اور ایک لڑکی بے ہوشی کی حالت میں پڑے ہیں۔ پولیس نے موقع پر پہنچ کر دونوں کو کھاجو والا کے سرکاری ہسپتال پہنچایا۔ متوفی کی شناخت اسی گاؤں کے کالو خان (24) کے طورپر ہوئی ہے۔ جائے وقوع پر کیڑے مار دوا کی بوتل بھی پڑی تھی۔

لڑکی کی حالت نازک ہونے پر ڈاکٹروں نے اسے بیکانیر کے لیے ریفر کر دیا ہے۔

تھانہ انچارج نے بتایا کہ دونوں ایک ہی گاؤں کے رہنے والے ہیں اور دونوں ماما زاد بھائی بہن ہیں۔ دونوں ہی غیر شادی شدہ ہیں۔ بادی النظر میں ان میں محبت ہونے کی بات سامنے آئی ہے۔

انہوں نے بتایا کہ متوفی کالو خان پک اپ وین میں دودھ سپلائی کرنے کا کام کرتا تھا۔ اس کی لاش کو پوسٹ مارٹم کے بعد گھر والوں کو سونپ دیا گیا ہے۔