ریاست راجستھان کے دارالحکومت جے پور میں ناگوری مسلم برادری کی جانب سے راجیہ سبھا رکن کروڑی لال مینا کے خلاف احتجاجی مظاہرہ کیا جائے گا۔ یہ مظاہرہ 18 اگست کو جے پور کے ناگوری کھو علاقے میں کیا جائے گا۔
ناگوری برادری کے سرکردہ لوگوں کے مطابق اس موقع پر ایک ریلی بھی نکالی جائے گی۔ یہ ریلی جے پور کے ناگوری کھو علاقے سے شروع ہوگی اور راجستھان کے وزیر اعلی اشوک گہلوت کی رہائش گاہ تک پہنچے گی۔ اس ریلی میں ہزاروں کی تعداد میں لوگوں کے شامل ہونے کی بات بھی سامنے آ رہی ہے۔
اس پورے احتجاجی مظاہرے کو لے کر ناگوری مسلم برادری سے تعلق رکھنے والے جمیل ناگوری کا کہنا ہے کہ ناگوری کھو علاقے میں ہندو اور مسلمان ایک ساتھ رہتے ہیں، جب ہندو بھائی کو تکلیف ہوتی ہے تو مسلمان اس کی مدد کے لیے سامنے آتا ہے اور جب مسلمان کو تکلیف ہوتی ہے تو ہندو بھائی اس کی مدد کے لیے آگے آتے ہیں۔
مزید پڑھیں:بھارت سرکار افغانستان اپنی فوج بھیج کر لوگوں کی مدد کرے: سید زین العابدین
انہوں نے کہا کہ ہم سبھی لوگ یہاں پر مل جل کر رہتے ہیں لیکن کروٹی لال مینا اپنی سیاست چمکانے کے لیے ہندو اور مسلمان کے درمیان اختلاف پیدا کرنا چاہتے ہیں۔
جمیل ناگوری نے کہا کہ وہ اپنے بیانوں میں جس طرح کے الفاظ کا استعمال کسی مخصوص قوم کو لے کر رہے ہیں، وہ غلط ہے۔ وہ جس طرح کی بیان بازی کر رہے ہیں، اس کے خلاف ہم لوگ 18 اگست کو سڑکوں پر اتریں گے اور احتجاجی مظاہرہ کریں گے۔
وہیں، ان کا کہنا ہے کہ ہم لوگوں کو جے پور کے تمام مسلمانوں کی حمایت بھی ملی ہے۔
واضح رہے کہ اس علاقے میں کروٹی لال مینا بھی 21 اگست کو ایک بائک ریلی نکالنے والے ہیں۔
