جے پور: ریاست راجستھان کے دارالحکومت جے پور میں کانگریس ایم ایل اے اور پارٹی کے کارکنان وزیر صحت پرساد لال مینا کی رہائش گاہ کے باہر احتجاجی دھرنا دے رہے ہیں۔ ریاستی وزیر کے خلاف جم کر نعرے بازی کی جارہی ہے۔ دراصل کشن پول اسمبلی حلقہ سے چار مسلم ڈاکٹرز کا تبادلہ کیا جارہا ہے، جس کے خلاف احتجاج کیا جارہا ہے۔ وہیں پولیس اہلکار اور ریاستی وزیر لوگوں کو سمجھانے کی کوشش کررہے ہیں، لیکن مظاہرین ماننے کے لیے تیار نہیں ہیں۔
اس سے متعلق رکن اسمبلی امین کاغذی کا کہنا ہے کہ جب ڈاکٹرز کے تبادلے کیے گئے تو ہم لوگوں کو اس بات کا یقین دلایا گیا کہ آپ کے حلقہ سے کسی بھی ڈاکٹرز کا تبادلہ نہیں کیا جائے گا، لیکن دیر شب ایک فہرست جاری کرکے ہمارے علاقے کے کئی ڈاکٹرز کا تبادلہ کر دیا گیا۔ اس لیے لوگوں میں ناراضگی ہے جو ڈاکٹر مسلم اکثریتی علاقوں میں اپنی بہترین خدمات انجام دیتے ہیں، ان لوگوں کا تبادلہ کر دینے کی وجہ سے میرے علاقے کے لوگوں میں کافی غم و غصہ ہے اور اسی بات کو لے کر میں وزیر صحت کی رہائش گاہ پہنچا ہوں۔ انہوں نے کہا کہ جب تک میرے مطالبے کی جانب توجہ نہیں دی جائے گی تب تک میں یہاں سے کسی بھی صورت میں واپس نہیں جاؤں گا۔
یہ بھی پڑھیں: Congress Protest in Jaipur: جے پور میں کانگریس کا مرکزی حکومت کے خلاف مظاہرہ
