جے پور: راجستھان کی راجدھانی جے پور میں مکر سنکرانتی کے موقع پر آج صبح سے ہی پتنگ بازی کا دور شروع ہو گیا۔ کورونا کے باعث دو سال بعد اس بار لوگ کھل کر جشن منا پا رہے ہیں، پتنگ میلے میں خاصا جوش و خروش پایا جاتا ہے اور صبح ہوتے ہی بچے اور نوجوان گھروں کی چھتوں پر چڑھ گئے اور پتنگ کے پیچ لڑانے کے ساتھ وہ کاٹا کا شور شروع ہو گیا۔ اس دوران لوگ صبح سے ہی چھتوں پر فلمی گانوں پر رقص کرتے ہوئے پتنگ اڑاتے نظر آئے۔ موسم صاف رہنے سے دن کا آغاز اچھا رہا اور دھوپ کھلنے اور ہلکی ہوا نے صبح ہی سے پتنگ بازی کا ماحول بنا دیا تھا۔
اگرچہ اس بار پتنگیں پہلے کی نسبت قدرے مہنگی ہوئی ہیں لیکن پتنگ بازوں پر اس کا کوئی اثر دکھائی نہیں دے رہا اور وہ اس پتنگ میلے میں بڑھ چڑھ کر حصہ لے رہے ہیں اور خوب لطف اندوز ہو رہے ہیں۔ اس بار بھی پونا، آدھی اور پرنٹ شدہ پتنگوں کی مانگ زیادہ رہی۔ سماجی پیغامات سے متعلق پتنگیں اور بچوں کی پسند کے کارٹون والی پتنگیں بھی خوب فروخت ہوئیں۔ ان میں موٹو پتلو، چھوٹا بھیم، ڈوری مین کی پتنگیں شامل ہیں۔ چائنیز مانجھے پر پابندی کے باعث اس بار اس کی فروخت نظر نہیں آ رہی۔ اس موقع پر جے پور کے جل محل سمیت مختلف سیاحتی مقامات پر ملکی اور غیر ملکی سیاح بھی پتنگ بازی سے لطف اندوز ہو رہے ہیں۔
یہ بھی پڑھیں: Rajasthan Celebrates Makar Sankranti: راجستھان میں مکر سنکرانتی کا تہوار جوش و خروش کے ساتھ منایا گیا
یو این آئی
