راجستھان کے دارالحکومت جے پور کے آمیر روڈ علاقے میں واقع سیاحتی مقام جل محل ان دنوں بدحالی کا شکار ہے۔ جے پور انتظامیہ کی جانب سے یہاں پر توجہ نہیں دینے کی وجہ سے جگہ جگہ گندا پانی نظر آرہا ہے اور جانور گھومتے ہوئے دکھائی دے رہے ہیں۔ جگہ جگہ درختوں کی ٹہنیاں ٹوٹی ہوئی دکھائی دے رہی ہیں۔ گندے پانی کی بدبو کی وجہ سے جو لوگ یہاں پر گھومنے کے لیے آرہے ہیں، انھیں دشواری ہورہی ہے۔
یہ بھی پڑھیں:راجستھان حکومت کے خلاف مسلمانوں کی ناراضگی جائز ہے: واجب علی
جس طرح کا منظر جل محل علاقے میں نظر آرہا ہے اس کے مدنظر یہی کہا جاسکتا ہے کہ یہ کوئی سیاحتی مقام نہیں ہے بلکہ کوئی گندے پانی کا مرکز ہے۔ یہاں پر تفریح کے لیے آئے سیاحوں نے کہا کہ' ہم لوگ کافی دنوں سے یہاں پر تفریح کرنے کے لیے آئے ہیں لیکن جس طرح سے یہاں پر جگہ جگہ پر گندا پانی جمع ہے اور جس طرح سے یہاں پر جانور گھوم رہے ہیں اس سے ہم لوگوں کو کافی برا لگ رہا ہے، انتظامیہ کو یہاں پر توجہ دینی چاہیے'سیاحوں نے حکومت سے مطالبہ کیا ہے کہ اس علاقے کو صاف وشفاف کیا جائے۔
