'رواں برس حج سے محروم لوگ کافی مایوس ہیں'

عالمی وبا کورونا وائرس کے باعث رواں برس بھی بھارتی شہری حج کے مقدس سفر پر نہیں جا سکیں گے، ایسے میں اس مرتبہ بھی جن لوگوں نے حج کی تیاریاں کر رکھی تھی ان لوگوں کے چہروں پر مایوسی نظر آ رہی ہے۔

راجستھان حج ویلفیئر سوسائٹی کے جنرل سیکریٹری حاجی نظام الدین نے سعودی حکومت کی جانب سے حج سے متعلق جاری کی گئی نئی گائیڈلائن سے متلعق اپنے خیال کا اظہار کیا۔

انہوں نے کہا سعودی حکومت کی جانب سے رواں برس صرف سعودی کے مقامی 60 ہزار شہری ہی حج کر سکیں گے، اس مرتبہ بھی بھارت سمیت دیگر ممالک کے شہری حج کی مقدس سعادت سے محروم رہیں گے۔

انہوں نے کہا کہ سعودی حکومت کی جانب سے جاری کی گئی نئی گائیڈ کے پیش نظر بھارتی شہریوں کو حج کی تیاریاں ترک کر دینی چاہئے چونکہ بھارت سمیت دیگر ممالک کے افراد رواں برس حج جیسی مقدس عبادت سے محروم رہیں گے۔

حاجی نظام الدین

انہوں نے کہا کہ اس وبا کی وجہ سے دوسری مرتبہ ایسا ہوا ہے جب حج کے سفر پر لوگ نہیں جا پائیں گے اور اسی وجہ سے بھارتی شہریوں کو کافی افسوس بھی ہے۔

انہوں نے کہا کہ رواں برس جن لوگوں نے حج کی تیاری کر رکھی تھی، ان کے چہرے پر مایوسی نظر آ رہی ہے۔ انہوں نے کہا کہ ہم خداوند قدوس سے دعا کرتے ہیں کہ اس وبا کا جلد سے جلد خاتمہ ہو اور آئندہ برس بھارت سے حاجی جا سکے۔

واضح رہے کہ دو روز قبل حج 2021 کو لے کر ٹویٹ کے ذریعہ عوام تک اطلاع پہنچائی گئی تھی۔