سحری کے دوران ہر گلی کوچے میں الوداعیہ نغموں کی صدا

ماہ مقدس اب ہم سے وداع لے رہا ہے۔ طاق راتوں کی عبادت کے لیے بھی گنے چنے ایام رہ گئے ہیں۔ ایسے میں حضرت سید خواجہ غریب نواز رحمتہ اللہ علیہ کے شہر اجمیر میں سحری کے دوران الوداعیہ نغموں سے گلی کوچے گونج رہے ہیں۔

اجمیر کی قدیم روایت کے مطابق روزہ داروں کو جگانے کے لیے سحری پارٹی نغمہ سرائی کیا کرتی ہے۔ مسلم علاقوں کی گلیوں اور محلوں میں مسلم نوجوان سحری کا وقت شروع ہوتے ہی روزہ داروں کو بیدار کرتے ہیں تاکہ وہ سحری تناول فرمالیں۔

سحری پارٹی کے استاد بھیا صاحب بتاتے ہیں کہ ماہ مقدس کے دوران سحری کے لیے لوگوں کو بیدار کرنے کی روایت عرصے سے جاری ہے۔

رمضان المبارک کے دو عشرے گزر جانے کے بعد اب تیسرا عشرہ چل رہا ہے۔ ایسے میں اب رمضان کی طاق راتوں میں اللہ عزوجل کی عبادت اور رمضان کو دکھ کے ساتھ الوداع کہا جارہا ہے۔