اس چادر کو ریاست راجستھان کے وزیر اعلی اشوک گہلوت اور نائب وزیراعلی سچن پائلٹ اجمیر شریف درگاہ لے کر پہنچے تھے جہاں ان کے ساتھ کانگریس کے متعدد رہنما موجود رہے۔
سونیا گاندھی کی چادر خواجہ معین الدین چشتیؒ کے عرس کے پانچ رجب کو پیش کرنے پہنچے کانگریس کارکنان اور ان کے رہنماؤں نے پولیس کی پختہ حفاظت کے درمیان عقیدت کی چادر پیش کی۔
چادر پیش کیے جانے سے قبل ہی درگاہ کے آس پاس کے بازاروں اور گلیوں کو بند کر دیا گیا تھا جس سے عام زائرین درگاہ کے اندر داخل نہ ہوسکے۔
سونیا گاندھی کی یہ عقیدت کی چادر جنتی دروازے سے داخل ہوکر سچن پائلٹ اور اشوک گہلوت نے اپنے ہاتھوں سے خواجہ صاحب کے مزار پر پیش کی۔
درگاہ میں حاضری کے بعد کانگریس رہنما نے سونیا گاندھی کا پیغام بھی پڑھ کر سنایا جس میں سونیا گاندھی نے ملک کے حالات کا ذکر کرتے ہوئے ملک کے باشندوں سے امن و امان قائم رکھنے کی گزارش کی ہے اور خواجہ غریب نواز کے پیغام کے ذریعے اپنی زندگی کو کامیاب بنانے کی دعا مانگی ہے۔
خواجہ غریب نواز کے عرس کے موقع پر پہلی بار سونیا گاندھی کی چادر کو لے کر ضلع انتظامیہ سنجیدہ نظر آیا یہی وجہ رہی کہ درگاہ کو زائرین سے سونیا گاندھی کی چادر پیش کیے جانے سے قبل ہی خالی کرا لیا گیا اور میڈیا کو بھی دوری بنانے کے لیے مجبور کر دیا گیا۔
