اجمیر: ریاست راجستھان کے ضلع اجمیر میں بی جے پی نے کانگریس کی قیادت والی ریاستی حکومت کے خلاف سڑکوں پر اتر کر احتجاج کیا۔ بی جے پی کے احتجاج کے سبب اجمیر میں آمد و رفت ٹھپ پڑ گئی۔ اس سے عام لوگوں کو پریشانیوں کا سامنا کرنا پڑا۔ احتجاجی مظاہرے میں بڑی تعداد میں بی جے پی کے رہنماؤں اور کارکنان نے شرکت کی۔ شہر کے انفارمیشن سینٹر چوراہے پر عام اجلاس سے خطاب کیا۔ اس کے بعد تمام کارکنان نے پیدل مارچ کیا اور ضلع کلکٹریٹ کے دفتر کا گھیراؤ کیا۔ بی جے پی کے ریاستی صدر سی پی جوشی بھی احتجاج میں حصہ لینے کے لیے اجمیر پہنچے تھے۔
بی جے پی کے ریاستی صدر سی پی جوشی نے اشوک گہلوت کی قیادت والی ریاستی حکومت پر جم کر بھڑاس نکالی اور اسے ہر محاذ پر ناکام قرار دیا۔انہوں نے کہا کہ اپنے خطاب میں کہا کہ کانگریس کی حکومت کی عوام مخالف پالیسیوں سے عام لوگ پریشان ہیں۔ غریب عوام اشوک گہلوت کی حکومت سے اکتا چکے ہیں۔ وہ تبدیلی چاہتی ہے۔
یہ بھی پڑھیں:Satya Pal Malik On Farmers اگر بی جے پی دوبارہ اقتدار میں آئی تو کسان نہیں بچیں گے، ستیہ پال ملک
انہوں نے کہا کہ ریاست میں بے روزگاری میں تشویشناک اضافہ ہوا ہے۔ نوجوان روزگار کی تلاش میں بیرون ریاستوں کا رخ کرنے پر مجبور ہیں۔ عوام کو ناکام حکومت نہیں چاہیے۔ دوسری طرف ضلع کلکٹریٹ دفتر کے باہر مظاہرے کے دوران بی جے پی اور پولیس کے درمیان جھڑپ ہوئی جس میں متعدد افراد زخمی ہوگئے۔ بی جے پی کے کارکنان اور پولیس کے درمیان جھڑپ سے وہاں افراتفری مچ گئی۔ پولیس نے فورا حالات کو قابو میں کیا۔ اس معاملے میں کسی کی گرفتاری عمل میں نہیں آئی۔
