راجستھان کے دارالحکومت جے پور میں مسلم تنظیموں کے ذمہ داران نے ای ٹی وی بھارت کے ذریعے مسلمانوں سے گھروں میں ہی رہ کر عید کی نماز ادا کرنے کی اپیل کی ہے۔
اس ضمن میں مختلف قائدین نے مسلمانوں سے اپیل کرتے ہوئے کہا کہ کورونا وبا کا قہر مسلسل جاری ہے۔ روزانہ ہزاروں کی تعداد میں لوگ اس سے متاثر ہورہے ہیں۔ اس لئے ہم لوگوں کو چاہیے کہ عید کے روز اپنے گھروں میں ہی رہیں۔ باہر کسی بھی صورت میں نہیں نکلیں اور نماز گھروں پر ہی رہ کر گزشتہ برس کی طرح ادا کریں۔
مسجدوں میں جن لوگوں کو نماز پڑھنے کے لئے حکومت کی جانب سے مقرر کیا گیا ہے وہی لوگ نماز ادا کریں۔
مسلم تنظیموں کے ذمہ داران کا کہنا ہے کہ ہم ہر مرتبہ حکومت کی جاری کردہ گائڈ لائنس کا پورا خیال رکھتے ہیں۔ اس لیے اس مرتبہ بھی ہم کو عہد کرنا چاہیے کہ گائڈ لائن کی خلاف ورزی نہیں کریں گے۔
ذمہ داران کا کہنا ہے کہ حکومت کی گائڈ لائنس ماننا ہم لوگوں کی ذمہ داری اور ہماری اخلاقیات میں شامل ہے۔ ہم لوگوں کو اگر اس وبا سے مقابلہ کرنا ہے تو حکومت کی جاری کردہ گائڈ لائنس پر مکمل طور پر عمل کرنا ہے۔
مزید پڑھیں:
عید سادگی کے ساتھ منائیں: خالد رشید فرنگی محلی
ساتھ ہی عیدالفطر کے تہوار کو سادگی سے منانے کی اپیل کرتے ہوئے انہوں نے کہا کہ آس پاس موجود پڑوسیوں کا اس موقع پر خاص خیال رکھیں۔
