عیدالاضحی کے موقع پر اجمیر شریف درگاہ میں عید کی خوشیاں منانے کیلئے کثیر تعداد میں زائرین پہنچیں گے اور حضرت خواجہ معین الدین چشتیؒ کی بارگاہ میں حاضری دیں گے۔
خاص بات یہ ہے کی عیدالاضحیٰ کے موقع پر درگاہ کا جنّتی دروازہ بھی کھول دیا جائے گا۔ 21 جولائی کو صبح چار بجے سے ظہر کی نماز تک عقیدتمندوں کے لیے جنّتی دروازہ کُھلا رہے گا۔
خادم سید قطب الدین سخی کے مطابق یہ جنّتی دروازہ خواجہ صاحب کے مزار مبارک کے قریب ہے اور اکثر عقیدتمند یہاں منت کا دھاگا باندھتے ہیں نیز زیارت کرنے کے لیے آستانہ میں داخل ہوتے ہیں۔
خاص بات یہ ہے کہ زیادہ تر بالی ووڈ فلم اسٹار بھی جنّتی دروازے پر ہی اپنی فلموں کی کامیابی اور زندگی میں خوشیوں کی منت کا دھاگا باندھتے ہیں۔
سلطان الہند کی بارگاہ میں جنّتی دروازہ سال میں چار مرتبہ عقیدتمندوں کے لیے کھولا جاتا ہے۔
رواں برس عیدالفطر اور بڑے سرکار خواجہ صاحب کے پیر و مرشد کے عرس کے موقع پر عقیدتمند درگاہ بند رہنے کی وجہ سے دیدار نہیں کر پائے تھے لیکن اب 21 جولائی کو اس جنّتی دروازے سے خاص اور عام زائرین آستانہ شریف میں داخل ہو سکیں گے۔
یہ بھی پڑھیں: اجمیر درگاہ کا خصوصی اسپرے سے سینیٹائزیشن
کووڈ 19 کے پیش نظر حکومت راجستھان کے ہدایت نامہ کے مطابق اجمیر درگاہ کو 73 روز تک بند رکھا گیا تھا۔ اب خواجہ صاحب کا دربار تمام عقیدتمندوں کے لیے کورونا گائیڈ لائن کے مطابق کھول دیا گیا ہے۔ ایسے میں اب زائرین کی آمد سے اجمیر کی گلیاں ایک بار پھر سے گلزار دکھائی دے رہی ہیں۔
