ناگور: راجستھان کے ضلع ناگور کے میرٹا روڈ تھانہ علاقے کے ایک گاؤں میں 6 دن قبل ایک سات سالہ بچی کے ساتھ جنسی زیادتی کی گئی۔ الزام ہے کہ دو نابالغ بچوں نے کنویں پر لے جاکر بچی کے ساتھ زیادتی کی۔ ان میں ایک بچے کی عمر سات سال بتائی جارہی ہے۔ بچی کے میڈیکل چیک اپ کے بعد دونوں ملزمین کے خلاف پاکسو ایکٹ کے تحت مقدمہ درج کیا گیا ہے۔ معاملے کی سنگینی کو دیکھتے ہوئے پولیس سپرنٹنڈنٹ رام مورتی جوشی نے میرٹا روڈ پولیس اسٹیشن پہنچ کر واقعہ کی جانکاری لی۔
رپورٹ کے مطابق 4 جولائی کو جب بچی کی طبیعت خراب ہوئی تو اہلخانہ بچی کو لے کر میرٹا کے سرکاری ہسپتال پہنچے، جہاں بچی کو پیٹ درد کی دوا دی گئی۔ 5 جولائی کو بھی بچی کی طبیعت ٹھیک نہیں ہوئی، تو بچی نے اپنے ساتھ ہوئی زیادتی کے بارے میں اپنے کے والد کو بتایا۔
متاثرہ کے والد کے مطابق بچی نے بتایا کہ 5 روز قبل پڑوس میں رہنے والے دو نابالغ ملزمین نے اسے بہلا پھسلا کر ایک کنویں پر لے گئے۔ وہیں، انہوں نے ایک چھپرے پر بچی کے ساتھ جنسی زیادتی کی۔ بچی چلائی تو لڑکوں نے اس کو دھمکی دی کہ اگر کسی کو کچھ بتایا تو تیرے والدین کو چاقو سے مار دیں گے۔ دھمکی سے بچی ڈر گئی اور اس نے 5 دن کو کسی کو کچھ نہیں بتایا۔
پولیس سپرنٹنڈنٹ رام مورتی جوشی نے کہا کہ مقدمہ درج کر لیا گیا ہے۔ تفتیش ڈپٹی سپرنٹنڈنٹ آف پولیس میرٹا کو سونپی گئی ہے۔ پولیس نے متاثرہ کا میڈیکل کروا لیا ہے۔ ساتھ ہی نابالغ بچوں کی عمر کے حوالے سے بھی تحقیقات جاری ہیں۔ عمر کی تصدیق کے بعد تحقیقات کو آگے بڑھایا جائے گا۔
