'کورونا کے دوران رپورٹنگ کر رہے صحافیوں کا بھی بیمہ ہو'

اینٹی ٹیریرسٹ فرنٹ انڈیا کے قومی صدر اور شری ہندو تخت کے قومی پرچارک وریش شانڈلیہ نے کورونا وباء کی رپورٹنگ کر رہے صحافیوں کا بھی 50 لاکھ روپے بیمہ کرنے کا مطالبہ کیا ہے۔

مسٹر شانڈلیہ نے وزیر اعظم نریندر مودی، اطلاعات اور نشریات کے وزیر پرکاش جاوڈیکر، وزیر خزانہ نرملا سيتارمن اور وزیر مملکت برائے خزانہ انوراگ ٹھاکر کو ای میل کے ذریعے مکتوب ارسال کرکے صحافیوں کے لیے بھی 50 لاکھ روپے کا بیمہ کور فراہم کرنے کا مطالبہ کیا ہے ۔

انہوں نے کہا کہ میڈیا کے کام کاج کو بھی لازمی خدمات میں شامل کیا جانا چاہیے۔

مسٹر شانڈلیہ کے مطابق کورونا کی خبر دینے کے لیے ملک کے صحافی فیلڈ سے رپورٹ بھیج رہے ہیں اور لوگوں سے مل کر معلومات حاصل کر رہے ہیں۔ اس لیے وہ خطرے کا سامنا کر رہے ہیں۔

انہوں نے کہا جس طرح مرکزی وزیر خزانہ نے ڈاکٹروں، اور صحت عملہ وغیرہ کے لیے 50 لاکھ روپے بیمے کا اعلان کیا ہے اسی طرح یہ سہولیات صحافیوں کو بھی ملنی چاہئے۔ انہوں نے ڈاکٹروں اور طبی عملے کو بیمہ کور دینے کے لیے مرکزی حکومت کا شکریہ ادا کیا۔