ترال: مشہور دلناگ چشمہ اور پارک انتظامیہ کی نظروں سے اوجھل

دلناگ پارک کا نظام فلوری کلچر محکمے نے اپنے ہاتھ میں لیا ہے اور کئی ملازمین کو وہاں تعینات بھی کیا گیا ہے لیکن عوام متعلقہ ملازمین کی کارکردگی سے مطمئن نہیں ہے۔

جنوبی کشمیر کے ضلع پلوامہ کے مین ٹاون ترال میں موجود چشمہ دلناگ اور اس کے نام پر بنایا گیا پارک انتظامیہ کی نظروں سے اوجھل ہے۔ یہ پارک ایڈیشنل ڈپٹی کمشنر ترال کے مقامی آفس سے چند گز کی دوری پر واقع ہے لیکن نہ جانے کیوں کر اس کی طرف توجہ دینے میں انتظامیہ گریز کر رہا ہے۔

انتظامیہ کی بے حسی کا اندازہ اس بات سے لگایا جا سکتا ہے کہ گزشتہ سال کی بھاری برف باری سے یہاں موجود ایک چنار کا درخت گر گیا۔ ایک سال بیت جانے کے بعد بھی درخت کا ملبہ یہاں سے نہیں اٹھایا گیا۔

مقامی شہری بشیر احمد نے ای ٹی وی بھارت کو بتایا 'اس پارک اور چشمے کو انتظامیہ نے پس پشت ڈال دیا ہے اور نہ ہی گرے ہوئے چنار کو اٹھانے کی کوشش کی جا رہی ہے اور پارک کی صفائی کی طرف بھی کوئی توجہ نہیں دی جارہی ہے'۔

وہیں ایک مقامی طالب علم برہان الدین نے بات کرتے ہوئے انتظامیہ کی بے حسی کو شدید تنقید کا نشانہ بنایا اور کہا 'مجھے لگتا ہے کہ انتظامیہ سوئی ہوئی ہے کیونکہ دلناگ جسے ترال کی شان تصور کیا جاتا ہے۔ یہ مقام انتظامیہ کی بے حسی کا شکار ہو رہا ہے'۔

دلناگ پارک کا نظام فلوری کلچر محکمے نے اپنے ہاتھ میں لیا ہے اور کئی ملازمین کو وہاں تعینات بھی کیا گیا ہے لیکن عوام متعلقہ ملازمین کی کارکردگی سے مطمئن نہیں ہے۔

وہیں جب پارک کی خستہ حالت کے بارے میں فلوری کلچر کے ایک مقامی عہدیدار عبدالغفور گنائی سے بات کی تو انہوں نے کہا 'ہمارا محکمہ تندہی کے ساتھ پارک کی عظمت رفتہ بحال کرنے میں لگا ہوا ہے اور کل سے پارک کی تجدید ومرمت کا کام شروع ہو گا تاکہ عوامی شکایات کا ازالہ ممکن ہو'۔