قصبہ پلوامہ کے شیخ محلہ کے لوگوں نے محکمہ جل شکتی کے خلاف برہمی کا اظہار کرتے ہوئے کہا کہ محکمہ نے انہیں پچھلے دس برسوں سے پینے کے صاف پانی سے محروم رکھا ہے۔
احتجاج کر رہے مرد و زن نے الزام عائد کرتے ہوئے کہا کہ وہ باقاعدگی کے ساتھ پانی کی فیس ادا کر رہے ہیں جس کے باوجود محکمہ جل شکتی انہیں پینے کے صاف پانی کی سپلائی سے محروم رکھ رہا ہے۔
احتجاج کر رہے لوگوں نے پینے کے پانی کی عدم دستیابی سمیت سڑکوں کی بدحالی، ڈرینیج سسٹم کے ناقص نظام کے حوالے سے بھی انتظامیہ کو تنقید کا نشانہ بنایا۔
ذرائع ابلاغ کے نمائندوں سے بات کرتے ہوئے مقامی خواتین نے کہا کہ سردی ہو یا گرمی انہیں ہر موسم میں پینے کا صاف پانی حاصل کرنے کے لیے روز آس پاس کے علاقوں کا رخ کرنا پڑتا ہے۔
اس حوالے سے میونسپل کونسل، پلوامہ کے وائس چیئرمین شبیر احمد نے کہا کہ پانی سمیت علاقے کے سبھی بنیادی مسائل کو ترجیحی بنیادوں پر حل کیا جائے گا۔
محکمہ جل شکتی کے اسسٹنٹ ایگزیکٹو انجینئر نے کہا کہ وہ اس معاملے کی جانچ کریں گے نیز انہوں نے کہا کہ وہ از خود علاقے کا معائنہ کر کے لوگوں کو پینے کے صاف پانی کی فراہمی کو جلد یقینی بنائیں گے۔
احتجاج کر رہے لوگوں نے انتظامیہ سے علاقے کے لوگوں کو درپیش مسائل خصوصا پانی کی عدم دستیابی کا مسئلہ جلد ازالہ کرنے کی اپیل کی۔
