پلوامہـ: پانی کی شدید قلت کے خلاف لوگوں کا احتجاج

پلوامہ کے قوئل علاقے میں پانی کی عدم دستیابی کے خلاف لوگوں نے محکمہ جل شکتی کے خلاف احتجاج کرتے ہوئے ’’جان بوجھ کر عوام کو پانی سے محروم‘‘ رکھنے کا الزام عائد کیا ہے۔

ضلع پلوامہ کے قوئیل علاقے میں لوگوں نے محکمہ جل شکتی کے خلاف احتجاجی مظاہرہ کرتے ہوئے علاقے میں پانی کی شدید قلت پر محکمہ جل شکتی سمیت ضلع انتظامیہ کو تنقید کا نشانہ بنایا۔

لوگوں نے اونتی پورہ - پلوامہ سڑک کو احتجاجاً بند کیا جس کی وجہ سے سڑک پر ٹریفک کی نقل وحمل کئی گھنٹوں تک بند رہی۔

احتجاج کر رہے لوگوں نے بتایا کہ گزشتہ کئی ہفتوں سے ان کے علاقے میں پانی کی سپلائی بری طرح سے متاثر ہے جس کی وجہ سے انہیں کافی مشکلات کا سامنا کرنا پڑ رہا ہے۔

انہوں نے کہا کہ علاقے میں پانی کی عدم دستیابی کے حوالے سے مقامی باشندوں نے کئی بار متعلقہ محکمہ سے رجوع کیا تاہم ’’انہوں نے علاقے میں پانی کی سپلائی بحال کرنے میں غیر سنجیدگی کا مظاہرہ کیا جس کے سبب لوگ احتجاج کرنے پر مجبور ہو گئے۔‘‘

محکمہ جل شکتی کے افسران اور متعلقہ نائب تحصیلدار نے موقع پر پہنچ کر عوام کو پینے کا پانی جلد مہیا کرانے کی یقین دہانی کی جس کے بعد لوگوں نے احتجاج ختم کیا۔

اس حوالے سے جب محکمہ جل شکتی کے ایک افسر نے بتایا کہ پانی کی سطح کم ہونے کی وجہ سے علاقہ میں پینے کے پانی کی سپلائی متاثر ہو رہی ہے تاہم انہوں نے کہا کہ علاقے کو پانی مہیا کرانے کے لیے جلد ہی ٹھوس اقدامات اٹھائے جائیں گے۔