کووڈ جانچ میں تاخیر سے عوام برہم

علاقے میں کورونا کی دوسری لہر کے بعد آر ٹی پی سی آر ٹیسٹوں کی جانچ میں تاخیر کے بارے میں میڈیا سے بھی نہیں بتایا جا رہا ہے۔

ضلع پلوامہ کے ترال میں کورونا وائرس کی دوسری لہر کے بیچ آر ٹی پی سی آر ٹیسٹنگ میں تاخیر پر عوامی حلقوں میں تشویش پائی جا رہی ہے۔ ان کا کہنا ہے کہ ٹیسٹنگ میں تاخیر ہو رہی ہے۔

علاقے میں کووڈ کے لیے بھیجے گئے تقریباً سات سو نمونے جانچ کے لیے جی وی سی ہسپتال سرینگر بھیجے گئے لیکن ہنوز ان کی رپورٹ آنی باقی ہے جس کی وجہ سے آبادی میں ناراضگی پائی جا رہی ہے۔

علاقے میں ہوم آئیسولیشن میں رکھے گئے افراد نے بھی الزام لگایا ہے کہ کووڈ ایس او پیز کے مطابق وقت گزارنے کے باوجود محکمہ صحت کے اہلکار ان کا دوبارہ ٹیسٹ نہیں کر رہے ہیں جس کی وجہ سے انہیں یہ بھی پتہ نہیں چل پا رہا ہے کہ وہ صحت یاب ہیں یا نہیں۔

اس ضمن میں ای ٹی وی بھارت کے ساتھ بات کرتے ہوئے الطاف احمد ساکن حکیم محلہ ترال بالا نے بتایا کہ ان کا بیٹا پندرہ روز قبل کورونا وائرس سے متاثر ہوا تھا لیکن محکمہ صحت کے اہلکار نے اس کا دوبارہ ٹیسٹ نہیں کیا۔ وہ کہتے ہیں کہ 'مجھے ڈر ہے کہ وہ احساس کمتری کا شکار ہو کر کہیں ہلاک نہ ہو جائے'۔

علاقے میں کورونا کی دوسری لہر کے بعد آر ٹی پی سی آر ٹیسٹوں کی جانچ میں تاخیر کے بارے میں میڈیا سے بھی نہیں بتایا جا رہا ہے۔ علاقے کے

سینیئر صحافی سید اعجاز نے ای ٹی وی بھارت کو بتایا کہ انہیں بھی اس حوالے سے مختلف دیہات سے شکایات موصول ہو رہی ہیں کہ مقررہ ایام کاٹنے کے بعد درجنوں افراد گھروں کے اندر محصور ہیں اور محکمہ صحت کی طرف سے ان کی جانچ کے لیے کوئی اقدامات نہیں کیے جا رہے ہیں۔ محکمہ صحت کے اہلکار ترال میں کووڈ کے حوالے سے میڈیا کو تفصیلات فراہم نہیں کر رہے ہیں جس کی وجہ سے وہ صحیح حقائق عوام کے سامنے نہیں لا رہے ہیں۔

عوامی حلقوں کا مطالبہ ہے کہ آر ٹی پی سی آر کے نتائج کو جلد ازجلد فراہم کرنے کے لیے اقدامات کیے جائیں۔

ادھر ای ٹی وی بھارت کو معلوم ہوا ہے کہ ضلع پلوامہ کے ٹیسٹ اب جے وی سی کے بجائے سی ڈی ہسپتال میں بھیج دیے جائیں گے جو کہ ایک خوش آئند بات ہے۔