پلوامہ: محاصرے کے دوران ایک عسکریت پسند کو گرفتار کرنے کا دعوی

فوج نے کہا ہے کہ انہوں نے نوجوان سے ایک پستول اور ایک دستی بم برآمد کیا ہے۔

جنوبی کشمیر کے پلوامہ ضلع میں فوج نے جمعرات کے روز ایک تلاشی کارروائی کے دوران ایک نو بھرتی عسکریت پسند کو گرفتار کرنے کا دعویٰ کیا ہے۔

سکیورٹی فورس نے کہا کہ عسکریت پسندوں کی موجودگی کے بارے میں مخصوص اطلاع ملنے کے بعد نیو کالونی علاقے کو محاصرے میں لیا گیا۔ جس میں پولیس، 55 آر آر اور سی ار پی ایف کے مشترکہ ٹیموں نے حصہ لیا۔

فوج کے مطابق انہوں نے تلاشی کے دوران ایک نوجوان کو گرفتار کیا جس کی شناخت ولایت عزیز میر عرف رسک ولد عبد العزیز میر ہنپورہ نیوہ کے بطور ہوئی ہے۔

فوج نے کہا ہے کہ انہوں نے اس نوجوان سے ایک پستول اور ایک دستی بم برآمد کیا ہے۔

انہوں نے بتایا کہ ولایت 15 جنوری سے لاپتہ تھا اور وہ عسکریت پسندوں کی صفوں میں شامل ہو گیا تھا۔