ڈی ڈی سی انتخابات کے نتائج کے اعلان کے بعد گپکار الائنس کی مشترکہ امیدوار رقیہ منظور نے آج میڈیا سے گفتگو کرتے ہوئے بی جے پی کے علاوہ نیشنل کانفرنس پر الزام عائد کیا کہ مجھے جان بوجھ کر ہرایا گیا۔
انہوں نے کہا کہ انتظامیہ نے میرے علاقے میں یقین دہانی کے باوجود بھی پولنگ مرکز قائم نہیں کیا وہیں دوسری جانب بی جے پی کی امیدوار کے آنگن میں پولنگ بوتھ قائم کیا گیا جس کی وجہ سے میرے علاقے کے لوگوں کو ووٹ ڈالنے کے لیے چھ سے سات کلو میٹر کا سفر طے کرنا پڑا تھا۔
رقیہ منظور نے کہا کہ میری مدمقابل بی جے پی کے جو امیدوار تھیں اسے کیسے پتہ تھا کہ جیت ان کی ہی ہوگی۔ انہوں نے ایسا کون سا کام کیا تھا جس کی وجہ سے وہ پُر اعتماد تھیں کہ وہ جیت جائیں گی۔ انہوں نے بی جے پی پر الزام لگایا کہ انہوں نے رائے دہندگان کو رقم فراہم کرائی ہے۔
وہیں خواتین کو ریزرویشن دینے کے حوالے سے انہوں نے کہا کہ مرکزی سرکار نے یہ بہتر فیصلہ کیا ہے۔ خواتین کو ریزرویشن دینے سے انہیں کافی خوشی ہوئی ہے۔
قابل ذکر ہے کہ کاکاپورہ ( بی ) نشست پر بی جے پی کی امیدوار منہا لطیف نے محض 14ووٹوں سے جیت درج کی ہے۔ اس نشست سے بی جے پی کی منہا لطیف کو 364 جبکہ گپکار الائنس کے مشترکہ امیدوار رقیہ منظور کو 350 ووٹ حاصل ہوئے تھے۔
