ضلع پلوامہ میں مختلف سرکاری محکموں - جن میں محکمہ ریونیو، پولیس اور بلدیاتی محکمہ کے ملازمین شامل ہیں - نے مشترکہ طور پر قصبہ پلوامہ کے مین مارکیٹ میں چیکنگ ڈرائیو کا انعقاد عمل میں لایا۔
ڈرائیو کے دوران عالمی وبا کورونا وائرس کے پھیلاؤ کو روکنے کے لیے وضع کیے گئے رہنما خطوط کی پاسداری نہ کرنے والے مختلف افراد سے 8000 روپے جرمانہ وصول کیا گیا۔ وہیں ٹیم نے ایک کیمسٹ کی دکان کو سربمہر بھی کردیا۔
پولیس افسران نے کہا کہ کورونا مثبت کیسز میں اگرچہ کمی واقع ہوئی ہے تاہم ماہرین کی جانب سے تیسری لہر کی پیشگوئی کو مدنظر رکھتے ہوئے ایس او پیز پر سختی سے عمل کرنے کی ضرورت ہے۔
انہوں نے کہا کہ محکمہ صحت کی جانب سے وضع کی گئی گائڈ لائنز پر عمل پیرا ہونے سے ہی وبائی بیماری سے بچا جاسکتا ہے۔
مزید پڑھیں؛ بارہمولہ میں حادثاتی فائرنگ سے پولیس اہلکار زخمی
محکمہ ریونیو کے ایگزیکٹیو مجسٹریٹ محمد رمضان نے ذرائع ابلاغ کے نمائندوں سے بات کرتے ہوئے کہا کہ ’’اگرچہ ضلع میں کووڈ متاثرین کی تعداد کافی کم ہوئی ہے تاہم لوگوں کو احتیاطی تدابیر پر عمل کرنا ترک نہیں کرنا چاہئے۔‘‘
انہوں نے مزید کہا کہ اس طرح کی مارکیٹ چیکنگ ڈرائیو کا مقصد جرمانہ وصول کرنا نہیں بلکہ لوگوں کو احتیاطی تدابیر خصوصاً ماسک پہننے اور سماجی فاصلہ برقرار رکھنے پر آمادہ کرنا ہے۔
