ترال: کورونا سے مزید ایک موت، عوام میں تشویش

جنوبی کشمیر کے ضلع ترال میں کورونا وائرس کی دوسری لہر کا قہر جاری ہے آج بھی ایک عمر رسیدہ خاتون کی کورونا وائرس سے موت ہوئی ہے۔

تفصیلات کے مطابق ترال کے ناگہ پتھری گاؤں سے تعلق رکھنے والی ایک 70 سالہ خاتون جو کہ کورونا سے متاثر ہونے کے بعد ضلع اسپتال پلوامہ میں زیر علاج تھیں آج ان کا انتقال ہوگیا۔

اس طرح علاقے میں کورونا وائرس کی اس دوسری لہر سے مرنے والوں کی تعداد 12 تک پہنچ گئی ہے، جبکہ اس وقت علاقے میں ساڑھے تین سو کے قریب فعال کیسز موجود ہیں۔

انتظامیہ نے پورے علاقے میں لاک ڈاؤن کا نفاذ عمل میں لایا ہے اور بازاروں میں سناٹا ہے، میڈیا سے بات کرتے ہوئے میونسپل کمیٹی ترال کے ایک عہدیدار عبدالسلام نے لوگوں سے اپیل کی کہ 'وہ بلا ضرورت گھروں سے باہر نہ آئیں اور رہنما خطوط پر مکمل طور پر عمل کریں تاکہ کورونا کی اس چین کو توڑا جا سکے'۔