ہفتہ کو جنوبی کشمیر میں پلوامہ ضلع کے پانپور علاقے میں انتظامیہ نے چار علاقوں کو کنٹینمنٹ زون کے زمرے میں شامل کر لیا۔
کنٹینمنٹ زونز میں نیو کالونی کدلہ بل، ہمدانیہ کالونی کدلہ بل، وانی محلہ اور زعفرانی قصبہ پانپور کا نملہ بل شامل ہے۔
محکمہ صحت اور تحصیل انتظامیہ کے عہدیداروں کی ایک مشترکہ ٹیم نے کنٹینمنٹ زونز کا دورہ کیا۔ ٹیم کے ممبروں ان علاقوں میں بینرز لگائے تاکہ لوگ کنٹینمنٹ زون کے اندر داخل ہونے میں احتیاط بریں۔
انتظامیہ کے مطابق نیو کالونی کدلہ بل، ہمدانیہ محلہ، میباغ نملہ بل اور قصبہ پانپور کے للوانی محلہ میں عالمی وبا کے تقریبا 28 فعال کیسز ہیں۔
بلاک میڈیکل آفیسر پانپور نے بتایا کہ پانپور میں کورونا کی دوسری لہر کے پیش نظر مثبت معاملات میں تیزی سے اضافہ ہو رہا ہے۔ انہوں نے کہا: ’’روزانہ تقریبا 20مثبت معاملات سامنے آ رہے ہیں۔‘‘
انہوں نے عوام سے رہنما خطوط کی پاسداری خصوصا ماسک پہننے اور سماجی دوری برقرار رکھنے کی تلقین کی۔
