ترال میں گرینیڈ حملہ، آٹھ افراد زخمی

ترال بس اسٹینڈ کے قریب مشتبہ عسکریت پسندوں نے سکیورٹی فورسز پر گرینیڈ داغا جو نشانے پر نہیں لگا اور سڑک پر ہی پھٹ گیا جس کے نتیجے میں آٹھ افراد زخمی ہو گئے۔

جنوبی کشمیر کے ضلع پلوامہ کے سب ضلع ترال میں مشتبہ عسکریت پسندوں نے سکیورٹی فورسز کی گاڑی کو نشانہ بنا کر گرینیڈ داغا جو نشانے پر نہیں لگا اور سڑک پر زور دار دھماکے کے ساتھ پھٹ گیا جس کے نتیجے میں آٹھ افراد کے زخمی ہونے کی اطلاع ہے۔

ذرائع کے مطابق یہ گرینیڈ حملہ ترال بس اسٹینڈ کے قریب آئی ٹی بی پی کی ایک گاڑی پر کیا گیا۔

زخمیوں کی شناخت جاوید احمد گنائی عمر 35 برس ساکنہ ترال، گل راتھر عمر 70 برس ساکنہ پنیر، صادق گجر ساکنہ حاکم، تابش عمر 25 برس دختر پستونہ، شہزادہ عمر 26 برس دختر غلام قادر ساکنہ پستونہ، تاجا عمر 65 برس زوجہ غلام رسول شیخ ساکنہ امیرآباد، شاہینہ عمر 24 برس زوجہ نزیر ڈار ساکنہ پستونہ اور بلال نائک عمر 30 برس ولد محمد اکرم ساکنہ ترال پائین کے طور پر ہوئی ہے۔

زخمی افراد کو نزدیکی ہسپتال منتقل کیا گیا ہے جہاں ان کی حالت مستحکم بتائی جا رہی ہے۔

حملے کے فوراً بعد سکیورٹی فورسز نے پورے علاقہ کو گھیرے میں لیا اور حملہ آوروں کی تلاش شروع کر دی ہے۔

ایس ڈی پی او ترال ڈاکٹر اعجاز ملک نے میڈیا سے گفتگو کرتے ہوئے بتایا کہ حملہ آوروں کو جلد پکڑا جائے گا۔