ضلع ترقیاتی کمشنر پلوامہ ڈاکٹر بشارت قیوم نے میونسپل کمیٹی پلوامہ میں ڈیجیٹل ویک کی تقریبات کا افتتاح کیا اور ڈیجیٹل اقدامات کی نمائش کرنے والی منفرد جھانکی کو جھنڈی دکھا کر روانہ کیا۔ ڈیجیٹل انڈیا مہم کے تحت کئی محکموں نے اپنے اسٹال لگائے تھے۔ متعلقہ محکموں کی طرف سے فراہم کردہ آن لائن ای خدمات جن میں آدھار انرولمنٹ، گولڈن کارڈز، محکمہ ریونیو کی مختلف خدمات، زمینی پاس بک کا اجراء کے علاوہ دیگر خدمات جن کا عوام آن لائن فائدہ اٹھا سکتے ہیں۔
محکموں نے زائرین کو ان خدمات کے بارے میں آگاہی فراہم کی۔ ترقیاتی کمشنر نے تمام سٹالز کا دورہ کیا اور سٹالز پر موجود متعلقہ محکموں کے ریسورس پرسنز سے بات چیت کے علاوہ زائرین سے ملاقات کی۔ لوگوں سے بات چیت کرتے ہوئے ترقیاتی کمشنر نے لوگوں پر زور دیا کہ وہ ان اقدامات کے فوائد سے استفادہ کریں جس سے مختلف سرکاری خدمات حاصل کرنے کے عمل میں آسانی ہوئی ہے۔
انہوں نے کہا کہ ڈیجیٹل انڈیا مہم کے تحت انتظامیہ آن لائن موڈ میں تبدیل ہو کر پیپر لیس گورننس کی طرف بڑھ رہی ہے۔ انہوں نے کہا کہ 1000 سے زیادہ اہم خدمات کو آن لائن موڈ میں منتقل کر دیا گیا ہے اور لوگوں کو ان خدمات سے فائدہ اٹھانے کے لیے اب سرکاری دفاتر جانے کی ضرورت نہیں ہے بلکہ وہ اپنے موبائل فون پر کلک کر کے فائدہ اٹھا سکتے ہیں۔ بعد ازاں میونسپل کمیٹی سے ایک منفرد جھانکی کو بھی جھنڈی دکھا کر روانہ کیا گیا جو حکومت کے ڈیجیٹل اقدامات کو اجاگر کرنے کے لیے مختلف عوامی مقامات پر گھومے گی۔
یہ بھی پڑھیں: Student Orientation Programme تعلیم میں ڈیجیٹل تبدیلی سے متعلق طلبا کےلئے شعور بیداری پروگرام
ڈاکٹر بشارت قیوم نے کہا کہ ڈیجیٹل خواندگی بہت ضروری ہے اور تمام طبقوں کے لوگوں کو ڈیجیٹل خواندگی بنایا جائے گا تاکہ انفارمیشن ٹیکنالوجی میں ہونے والی ترقی کے ثمرات سب تک پہنچیں۔ ڈی سی نے کہا کہ ہفتہ بھر کی تقریبات کے دوران حکومت کی طرف سے پیش کی جانے والی ڈیجیٹل خدمات کے بارے میں بیداری پیدا کرنے کے لیے کئی سرگرمیاں منعقد کی جا رہی ہیں۔ انہوں نے کہا کہ پینٹنگ، کوئز اور PRI بات چیت کے سیشن ہوں گے اس کے علاوہ VC بات چیت بھی ہوگی جس میں سرکاری اہلکار ڈیجیٹل خدمات کے بارے میں بیداری پیدا کریں گے۔
