ترال:وادی کشمیر میں گزشتہ دنوں سے ہو رہی بارشوں کی وجہ سے جہاں درجہ حرارت میں کمی ہوئی ہے اور لوگوں نے گرمی سے راحت حاصل کی، وہیں مسلسل بارشوں کے نتیجے میں فصلوں، میوہ جات اور سبزی میں کیڑوں نے نقصان پہنچا دیا ہے۔
جنوبی کشمیر کے ترال علاقے میں بھی مسلسل بارشوں سے کسانوں کی پریشانیاں بڑھ گئی ہیں کیونکہ علاقے میں سیب کے باغات میں مایٹ اور دیگر بیماریاں پھیل رہی ہیں ۔ مقامی کسانوں نے الزام عائد کیا کہ ہارٹیکلچر یا زراعت محکمے کے عہدیدار دفاتر سے باہر نکلنے میں عار محسوس کر رہے ہیں۔
ای ٹی وی بھارت کے ساتھ بات کرتے ہوئے مقامی لوگوں نے الزام عائد کیا کہ مسلسل بارش سے جہاں سبھی کھڑی فصلوں کو نقصان پہنچا ہے وہیں سیب کے باغات میں بیماریوں نے جنم لیا ہے جس کی وجہ سے میوہ صنعت کو بڑے، پیمانے پر نقصان پہنچ سکتا ہے۔
وہیں علاقے کے بالائی دیہات میں مکئی کی فصل کو بھی نقصان ہوا ہے۔ لوگوں نے انتظامیہ سے متاثرہ علاقوں میں ٹیمیں تشکیل دینے اور معاوضے کا مطالبہ کیا ہے۔
مزید پڑھیں:
اس دوران ای ٹی وی بھارت نے ہارٹیکلچر اور ایگریکلچر دفاتر جا کر محکمانہ رپورٹ لینے کی کوشش کی لیکن دونوں مقامات پر آفیسران دستیاب نہیں تھے اور کہا گیا کہ وہ میٹنگ میں پلوامہ گئے ہیں۔
