گھر میں پانی داخل ہونے سے کمہار کا بڑا نقصان

علی محمد کمہار نے بتایا کہ لاک ڈاؤن کے ایام میں ان کی محنت ضائع ہوگئی ہے اور اب وہ شدید مالی مسائل کا شکار ہیں۔

گزشتہ شب وادی میں ہوئی شدید بارش کے بعد جہاں عوام نے راحت کی سانس لی، وہیں ضلع پلوامہ کے ترال علاقے میں تکیہ رازق شاہ بستی کے نزدیک علی محمد کمہار کا مکان پانی سے بھر گیا۔

علی محمد کے اہل خانہ نے بتایا کہ پانی کی لہروں سے ان کی تین ماہ کی کمائی چلی گئی۔ چونکہ علی محمد مٹی کے برتن بنانے کا کام کرتے ہیں ایسے میں ان کے بنائے کچے برتن پانی میں ڈوب گئے۔

مغلی بیگم نے آنسوؤں سے پر لہجے میں میڈیا کو بتایا کہ آسمانی بجلی گرنے سے ان کی ساری کمائی مِنٹوں میں ضائع ہوگئی۔ وہ سوچ رہے ہیں کہ اب وہ کہاں جائیں۔

علی محمد کمہار نے بتایا کہ لاک ڈاؤن کے ان ایام میں ان کی محنت ضائع ہو گئی ہے اور اب وہ شدید مالی مسائل کا شکار ہیں۔ اس لیے انہوں نے انتظایہ سے مدد کی اپیل کی ہے۔