سابق وزیر اعلیٰ عمر عبداللہ کی طرف سے یہ انکشاف کرنے پر کہ مرکز پی ڈی پی کو توڑنے کی کوشش کر رہا ہے، مشتاق احمد شاہ نے بتایا کہ 'یہ بات ڈھکی چھپی نہیں ہے کہ پی ڈی پی کو توڑنے کی کوشش کی گئی ہے بلکہ کچھ حد تک مرکز اس میں کامیاب بھی ہوا ہے۔'
جموں و کشمیر میں موجودہ سیاسی صورتحال پر پی ڈی پی کے سینیئر رہنما اور سابق رکن اسمبلی ترال مشتاق احمد شاہ نے ای ٹی وی بھارت کے ساتھ خصوصی بات چیت کی
یہ پوچھے جانے پر کہ کیا آپ عمر عبداللہ کے انکشاف کی تائید کرتے ہیں؟ مشتاق احمد شاہ نے بتایا کہ 'یہ بالکل درست ہے کیونکہ آخرکار نئی نئی سیاسی جماعتیں کشمیر میں ہی کیوں بن رہی ہیں۔ جموں میں کیوں نہیں اور ملک کی دیگر ریاستوں میں کیوں نہیں۔ یہ پالیسی کشمیر کو توڑنے کی ہے لیکن ہم اپنے موقف پر اٹل ہیں اور ہماری پارٹی ایک غیر متزلزل جماعت ہے جس کو سازشوں سے توڑا نہیں جا سکتا ہے۔'
مشتاق احمد شاہ نے علاقائی جماعت کے رہنماؤں سے اپیل کی کہ وہ متحد ہو کر جموں و کشمیر کے تشخص کو برقرار رکھنے کے لیے آگے آئیں۔
