جنوبی کشمیر کے ضلع پلوامہ میں بی ڈی سی چیئرمین نے پیر کو ترقیاتی کاموں کا جائزہ لینے کے لیے متعلقہ ٹھیکہ داروں کے ساتھ بی ڈی او آفس لاسی پورہ میں میٹنگ منعقد کی۔
اس سلسلے میں ٹھیکہ داروں کے علاوہ علاقے کے سرپنچوں نے بھی اس میٹنگ میں شرکت کی۔ وہیں مختلف علاقوں سے آئے ہوئے عوامی وفود نے بھی چیئرمین کو اپنے علاقوں میں ہو رہے کاموں کے بارے میں آگاہ کیا۔
اس سلسلہ میں بی ڈی سی چیئرمین نے ای ٹی وی بھارت کے ساتھ بات کرتے ہوئے کہا کہ ’’بیک ٹو ولیج 1اور 2 میں شروع کیے گئے کاموں کو 50فصدی مکمل کیا گیا ہے تاہم محکمہ آر آینڈ بی اور محکمہ پی ڈی ڈی کی جانب انجام دیے جانے والے متعدد کام باقی ماندہ ہیں۔‘‘
انہوں نے دعویٰ کیا کہ ’پی ایم آئی اے‘ سکیم کے تحت لوگوں کو مکان تعمیر کرنے کے لئے ابھی تک رقومات واگزار نہیں کی گئیں ہیں، اس ضمن میں انہوں نے انتظامیہ سے اپیل کی کہ عوام کو راحت پہنچانے کے لیے جلد سے جلد رقومات واگزار کی جائیں۔
دریں اثناء بی ڈی سی چیئرمین نے کہا کہ ’’حفاظتی انتظامات کے پیش نظر ہم مختلف علاقوں کا دورہ کرکے عوام کو درپیش مسائل کا زمینی سطح پر مشاہدہ نہیں کر پاتے ہیں۔‘‘ انہوں نے انتظامیہ سے عوامی نمائندوں کو سیکورٹی فراہم کرنے کی اپیل کی ہے۔
