’پلوامہ میں یومیہ 150کورونا مریضوں کو اسپتال میں داخل کیا جا رہا ہے‘

ضلع ترقیاتی کمشنر پلوامہ بصیر الحق چودھری نے ضلع میں کووڈ 19 کی موجودہ صورتحال کے بارے میں میڈیا نمائندوں کو معلومات فراہم کرتے ہوئے کہا کہ ضلع میں یومیہ 150سے 160کورونا مریضوں کو اسپتال میں داخل کیا جا رہا ہے تاہم 250سے300مریض روزانہ صحت یاب بھی ہو رہے ہیں۔

ڈی سی پلوامہ نے ضلع میں کورونا کی موجودہ صورتحال سے متعلق معلومات فراہم کرتے ہوئے کہا کہ گزشتہ کئی دنوں سے کورونا کے سبب ہوئی اموات میں کمی واقع ہوئی تھی تاہم گزشتہ روز اس موذی وائرس کے سبب چار افراد فوت ہو گئے۔

انہوں نے کہا کہ یومیہ بنیادوں پر درج کیے جا رہے کورونا مثبت کیسز میں ضلع پلوامہ کی شرح 11فیصد سے زیادہ نہیں ہے تاہم دیگر اضلاع کے مقابلے میں ضلع پلوامہ میں مثبت کیسز کی شرح ابھی بھی زیادہ ہے۔

ڈی سی پلوامہ کے مطابق مہلک بیماری میں مبتلا ہونے والے مریضوں کی تعداد کو قابو میں کرنے اور مریضوں کی نشاندہی کے لیے ضلع میں سرویلینس ٹیموں کی تعداد میں اضافہ کر دیا گیا ہے۔

ویکسینیشن کے حوالے سے ڈی سی پلوامہ نے کہا کہ ’’ضلع میں ویکسینیشن کے عمل میں بھی تیزی لائی جا رہی ہے اور عنقریب ہی ضلع پلوامہ میں 100فیصد ویکسینیشن ٹارگیٹ کو مکمل کیا جائے گا۔‘‘

انہوں نے کہا کہ اسپتالوں اور طبی مراکز کے علاوہ گھر گھر جاکر لوگوں کو کورونا مخالف ویکسین فراہم کی جا رہی ہے۔

عالمی وبا کو مزید پھیلنے سے روکنے کے لیے انہوں نے عوام سے وضع کیے گئے رہنما خطوط پر سختی سے عمل کرنے کی تلقین کی۔