سرحدی ضلع پونچھ میں ڈاک بنگلو منڈی کے باہر گندگی کے ڈھیر جمع ہونے سے نہ صرف راہگیروں کو دقتوں کا سامنا کرنا پڑ رہا ہے بلکہ اس سے ضلع میں صفائی ستھرائی کے حوالے سے کیے جا رہے بلند و بانگ دعووں کی قلعی بھی کھل جاتی ہے۔
مقامی باشندوں نے انتظامیہ کو شدید تنقید کا نشانہ بناتے ہوئے کہا کہ انتظامیہ کی جانب سے آئے روز ڈاک بنگلو منڈی میں تقاریب کا اہتمام کیا جاتا ہے، تاہم اس کے باوجود ڈاک بنگلو کے متصل جمع گندگی کے ڈھیر کو صاف نہیں کیا جا رہا۔
انہوں نے مزید کہا کہ مقامی بازاروں سے نکلنے والا سارا کوڑا کرکٹ ڈاک بنگلو کے سامنے انڈیل دیا جاتا ہے۔
مقامی باشندوں نے انتظامیہ کی جانب سے چلائی جا رہی صفائی مہم کے حوالے سے کہا کہ ’’ضلع میں صفائی ستھرائی محض کاغذوں کی حد تک ہی محدود ہو کر رہ گئی ہے، جبکہ زمینی سطح پر صورتحال اس کے بالکل برعکس ہے۔‘‘
مزید پڑھیں: پونچھ: فوج کی جانب سے والی بال مقابلے کا اہتمام
انہوں نے کہا کہ ڈاک بنگلو میں سیاسی، سماجی و دیگر تقاریب کا اہتمام کیا جاتا ہے جس کے سبب روزانہ سینکڑوں افراد ڈاک بنگلو آتے رہتے ہیں جنہیں کوڑا کرکٹ کا ڈھیر جمع ہونے سے سخت پریشانیوں کا سامنا کرنا پڑ رہا ہے۔
انہوں نے انتظامیہ سے ڈاک بنگلو کے متصل جمع کوڑا کرکٹ کو فوری طور صاف کیے جانے کا مطالبہ کیا۔
