ایک دفاعی ترجمان نے بتایا کہ پونچھ کے منکوٹ سیکٹر میں ایل او سی پر پاکستانی فوج نے منگل کے روز قریب پونے تین بجے بھارتی چوکیوں کو نشانہ بنا کر بلا کسی اشتعال کے شدید گولہ باری شروع کر دی۔
انہوں نے بتایا کہ پاکستانی فوج نے قصبہ، کرنی اور مینڈھر سیکٹرز میں بھی ایل او سی پر جنگ بندی معاہدے کی خلاف ورزی کرتے ہوئے گولہ باری شروع کردی۔
موصوف ترجمان نے بتایا کہ بھارتی فوجی جوانوں نے ان حملوں کا موثر جواب دیا۔ تاہم فی الوقت کسی بھی جانب سے کسی جانی یا مالی نقصان کی کوئی اطلاع نہیں ہے۔
قابل ذکر ہے کہ سرکاری اعداد و شمار کے مطابق جموں و کشمیر کی سرحدوں پر سال 2020 کے دوران ہندوستان اور پاکستان کی فوج کے درمیان گولہ باری کے تبادلے کے زائد از پانچ ہزار واقعات رونما ہوئے ہیں۔
بھارت اور پاکستان کے مابین سال 2003 میں جنگ بندی معاہدہ طے پایا تھا لیکن اس کے باوجود بھی طرفین کے درمیان ایک دوسرے کے ٹھکانوں پر گولہ باری کا سلسلہ بدستور جاری ہے جس سے سرحد کے آر پار بستیوں کے لوگوں کا جینا مشکل ہوکر رہ گیا ہے۔
