اڈیشہ کے وزیر اعلی نوین پٹنائک نے جمعہ کے روز وزیر اعظم نریندر مودی سے طوفان سے نمٹنے کے لئے ریاست کے ساحلی علاقوں میں مستقل بنیادی ڈھانچے، کوسٹل سٹروم سرج پروٹیکشن پلان اورڈیزاسٹر ریزیسٹنس پاور سسٹم کے لئے امداد فراہم کرنے کا مطالبہ کیا۔
پٹنائک نے یہ مطالبہ آج یہاں وزیر اعظم مودی کی صدارت میں بیجو پٹنائک بین الاقوامی ہوائی اڈے پر ان کے پہنچنے پر منعقدہ جائزہ میٹنگ میں کیا۔
اسپیشل ریلیف کمشنر (ایس آر سی) پردیپ جینا نے جائزہ میٹنگ کے بعد نامہ نگاروں کو بتایا کہ ریاستی حکومت نے طوفان یاس سے متاثرہ علاقوں میں بحالی کے کاموں کے لئے کسی طرح کی خصوصی امداد کی مانگ نہیں کی۔
انہوں نے کہا کہ وزیر اعظم اور وزیراعلیٰ کے طوفان سے متعلق پاورپوائنٹ پریزنٹیشن دینے سے پہلے آٹھ منٹ کا ویڈیو پروجیکشن دیا گیا۔
انہوں نے کہا کہ طوفان یاس نے بہت سارے دیہات کو زیر آب کر دیا ہے اور وزیراعلیٰ نے طوفان کو کم کرنے کے لئے طویل مدتی حل اور ساحلی طوفان سے بچاؤ کے منصوبے پر زور دیا ہے۔
