مہاراشٹرکے دارالحکومت ممبئی میں مزدوروں نے لاک ڈاؤن کی مدت میں تین مئی تک توسیع ہونے کے اعلان کے بعد آج سہ پہر اپنے گھر جانے کے لیے ہزاروں کی تعداد میں جمع ہوگئے۔
مزدوروں کی بھیڑ جمع ہونے کی اطلاع ملتے ہی پولیس اور سی آر پی ایف کی ٹیم موقع پر پہنچ گئی اور بھیڑ کو منتشرکرنے کے لیے لاٹھی چارج کیا ۔
پولیس کی لاٹھی چارج کے دوران بیشتر مزدور زخمی ہوگئے۔
اس دوران مزدوروں نے کہا کہ ہم ایک ماہ سے بے روزگار ہیں یومیہ اجرت پر کام کرتے تھے ابھی تک علاقہ میں یہاں وہاں سے کھانا آتا تھا۔ ہم لوگ کھالیتے تھے لیکن اب وہ بھی آنا بند ہوگیا ہے۔ تو ہم کہاں جائیں، کیا کریں، ان میں کچھ عورتیں بھی تھیں وہ بھی کہہ رہی تھیں کہ دو تین بچے ہیں گھر میں اناج تک نہیں ہے ایسے میں ہم کیا کریں کیا نہ کریں۔
وہیں ایک زری کا کام کرنے والے کاریگر نے بتایا کہ ہم لوگوں نے اتنا دن کسی طرح سے بڑی مشکل سے گزارا جہاں کہیں بھی کھانا پکتا تھا ہم وہاں پہنچ کر کھا لیتے تھے۔یا کوئی آکر دے جاتا تھا لیکن کھانا بٹنا بھی بہت جگہوں پر بند ہوگیا۔ اب کہیں سے کوئی امید نہیں ہے۔
