کورونا وائرس کے تعلق سے حکومت کی جانب سے جاری نئی گائیڈ لائنز سے ہر خاص و عام پریشان ہے۔ شہر مالیگاؤں میں رمضان المبارک کے پیش نظر کاروباری افراد اور دکاندار لاک ڈاؤن کی مخالفت پر آمادہ ہے اور سیاسی رہنما سٹرکوں پر احتجاج کرنے میں مصروف نظر آرہے ہیں۔
اس سلسلے میں جنتادل سیکولر کی صدر شان ہند نہال احمد نے مہاراشٹر میں لاک ڈاؤن نافذ کرنے کے خلاف 13 اپریل بروز منگل دوپہر 3 بجے اے ٹی ٹی ہائی اسکول کے پاس خواتین کے ذریعے تالی، تھالی اور ڈبہ بجا کر احتجاج کرنے کا اعلان کیا ہے۔رمضان المبارک قریب ہے اور ریاست بھر میں دوبارہ لاک ڈاؤن نافذ ہونے کے امکانات ہر گزرتے دن کے ساتھ بڑھتے جارہے ہیں۔شہر میں گزشتہ ایک ہفتے میں مجلس اتحاد المسلمین، کانگریس اور جنتا دل کی جانب سے لاک ڈاؤن کی مخالفت مختلف طریقوں سے احتجاج کی صورت میں کی گئی۔
اس لیے جمہوری طرز قانون کے دائرے میں رہتے ہوئے احتجاج کرنا اور اپنے حق کی لڑائی لڑنا ضروری ہوگیا ہے۔اس تعلق سے سنّی تعزیہ کمیٹی نے شان ِہند کو لیٹر دے کر منگل کو ہونے والے خواتین کے احتجاج کی تائید و حمایت کا اعلان کیا ہے اور شہر کی خواتین سے احتجاج میں شامل ہونے کی گزارش کی ہے. اسی طرح شہر کے انصاف پسند لوگوں سے بھی گزارش کی گئی ہیکہ سیاست کو بالائے طاق رکھ کر عوام کے حق کی اس لڑائی میں ساتھ دینے کے لیے اپنے گھر کی خواتین کو باپردہ تحریک میں شامل ہونے کے لیے بھیجیں۔
