حسین دلوائی نے کہا کہ کانگریس پارٹی کے اراکین پارٹی ہائی کمان کی ہدایت پر عمل کریں گے۔
کانگریس کے اراکین اسمبلی ایک ساتھ ہیں۔ کوئی بھی رکن اسمبلی پارٹی سے الگ نہیں ہوگا۔ اراکین اسمبلی ہائی کمان کی پیروی کریں گے۔ ہم بی جے پی کو ریاست میں حکومت بنانے کی اجازت نہیں دیں گے۔
انہوں نے کہا کہ نشنلسٹ کانگریس پارٹی ہماری اتحادی جماعت ہیں وہ ہمارے ساتھ ہیں اور لوگوں نے مہاراشٹر کو بچانے کے لیے ہمیں ووٹ دیا ہے۔
حسین دلوائی نے کہا کہ مجھے پورا یقین ہے کہ بی جے پی ہمارے اراکین اسمبلی کو دام میں نہیں پھنسا سکتی۔
گذشتہ روز انہوں نے شیوسینا کے ساتھ اتحاد کرنے کا اشارہ بھی دیا اور کہا کہ ادھو ٹھاکرے کی زیرقیادت شیوسینا سے اگلے وزیر اعلی پر دونوں جماعتیں تبادلہ خیال کرسکتی ہیں۔انہوں نے یہ بھی کہا کہ پارٹی جو بھی فیصلہ لیں گی وہ این سی پی کے ساتھ مل کر لیں گی۔
انہوں نے مزید کہا کہ ہم نہیں چاہتے کہ بی جے پی کا وزیر اعلی ہو۔ کانگریس اور این سی پی بی جے پی کا وزیر اعلی نہیں چاہتے ہیں۔ ہمیں نہیں لگتا کہ یہ اچھی بات ہے۔
واضح رہے کہ مہاراشٹر میں 9 نومبر حکومت سازی کے لیے آخری تاریخ ہے۔شیوسینا کابینی محکمہ اور وزیر اعلی کے عہدے کے لیے بضد ہے۔
مہاراشٹر اسمبلی انتخابات کے نتائج کا اعلان 24 اکتوبر کو کیا گیا تھا جس میں بی جے پی 105 سیٹوں پر کامیابی ملی تھی جب کہ شیوسینا 56 سیٹوں پر جیت حاصل کی ہے۔
