ادھو ٹھاکرے نے جب سے مہاراشٹر کے وزیراعلی کا عہدہ سنبھالا ہے تب سے وہ سیاسی رقیبوں کے نشانے پر ہیں اس کے قبل ان کے خلاف ایک شخص نے نازیبا کلمات کہا تھا جبکہ سابق وزیراعلی دیویندر فڑنویس کی بیوی امرتا فڑنویس نے سوشل میدیا پر ان کے خلاف تبصرے کئے تھے اور اب ان کی سرکاری رہائش گاہ کا معاملہ سامنے آیا ہے جہاں ان کے سرکاری بنگلے ورشا کے ایک کمرے میں نفرت انگیز کلمات لکھے پائے گئے۔
تفصیلات کے مطابق وزیراعلی کے سرکاری بنگلے 'ورشا' کے ایک کمرے میں انگریزی زبان میں کچھ اس قسم کی تحریرلکھی گئی ہے جس کے مطابق 'ہو از یو ٹی۔۔۔'، 'یو ٹی از مین' جس کا مطلب 'ادھو ٹھاکرے کون ہیں؟ ادھو ٹھاکرے برے آدمی ہیں۔'
حالانکہ تحریر میں کہیں بھی ادھو ٹھاکرے کا ذکر نہیں کیا گیا ہے لیکن اندازہ لگایا جا رہا ہے کہ 'یو ٹی' کا فل فارم ادھو ٹھاکرے ہے۔
اسی طرح کمرے میں سابق وزیراعلی دیویندر فڑنویس کی شان میں بھی کئی کلمات تحریر ہیں جس کے مطابق 'دیویندرفڑنویس از راک' اور 'بی جے پی از راک'۔
فی الوقت ورشا بنگلہ سرکاری محکمہ پی ڈبلیو ڈی کی تحویل میں ہے اور اس کی تجدید اور تزئین کاری کا کام جاری ہے، نیز سابق وزیراعلی دیویندر فڑنویس اپنے اہل خانہ کے ہمراہ اسی بنگلے میں رہائش پذیر تھے اور مہاراشٹر میں اقتدار میں تبدیلی کے بعد انہیں یہ بنگلہ انہیں خالی کرنا پڑا تھا۔
جس کمرے میں ادھو ٹھاکرے کے خلاف نفرت انگیز اور دیویندر فڑنویس کے تعریفی کلمات لکھے گئے ہیں وہ کمرہ دیویندر فڑنویس کی بیٹی کے استعمال میں تھا۔
محکمہ پی ڈبلیو ڈی کا کہنا ہے کہ 'سابق وزیراعلی کی جانب سے بنگلہ خالی کرنے کے بعد کسی بھی دوسرے شخص کو بنگلے میں جانے کی اجازت نہیں ہے۔
واضح رہے کہ ریاست کے دونوں سیاست دانوں کے بیچ رسہ کشی جاری ہے اور حال ہی میں دیویندر فڑنویس کی اہلیہ نے ادھو ٹھاکرے سمیت شیوسینا کے تعلق سے کئی تنقیدی ٹوئٹ کیے تھے۔
دیویندرفڑنویس فی الوقت شمال ممبئی میں رہائش پذیر ہیں اور چند دنوں بعد وہ اپوزیشن لیڈر کو دستیاب ہونے والے سرکاری بنگلے 'ساگر' میں جلد ہی منتقل ہو جائیں گے۔
