ریاست مہاراشٹر کے مسلم اکثریتی شہر مالیگاؤں میں ٹیپو سلطان کی 270ویں یوم پیدائش کے موقع پر انہیں خراج عقیدت پیش کیا گیا۔
اس مرتبہ کورونا وبا کے باعث عائد کی گئی پابندیوں کی وجہ سے شہر میں کہیں بھی جلوس اور کوئی بڑی تقریب منعقد نہیں ہوئی لیکن مالیگاؤں کے معروف سماجی کارکن رضوان بیٹری والا نے ٹیپو سلطان چوک میں مختصر طور پر ٹیپو سلطان کی ولادت کا جشن سادگی کے ساتھ منایا۔
رضوان بیٹری والا نے ٹیپو سلطان کے نام سے منسوب ٹیپو سلطان چوک کی تختی کو صاف کیا اور احترام کے ساتھ گلپوشی کی اور مقامی لوگوں کے سامنے مجاہد آزادی ٹیپو سلطان کی شہادت اور کارناموں کو بیان کیا۔
انھوں نے حکومت سے اپیل کرتے ہوئے کہا کہ حکومت ٹیپو سلطان کا یوم پیدائش منائے یا نہ منائے کم از کم شہر میں تو ایک چھوٹی تقریب منعقد کرنے کی اجازت دی جانی چاہیے تھی۔
رضوان بیٹری والا نے سوال کیا کہ ٹیپو سلطان چوک نام سے منسوب اداروں اور ان کے نام کی مالا جپنے والے رہنماؤں نے کیوں نہیں ٹیپو سلطان کی یوم پیدائش پر خراج عقیدت پیش کیا۔
