شیوسینا کے ایک رہنما نے بتایا کہ وفد غیر یقینی بارش سے متاثرہ کسانوں کے لیے فوری مالی امداد کا مطالبہ کرے گا۔
ریاستی اسمبلی انتخابات کے نتائج کا اعلان ہونے کے چند روز بعد مہاراشٹر میں شیوسینا کے نومنتخب اراکان اسمبلی نے آج پارٹی کے سینئر رہنما ایکناتھ شندے کو ان کی مقننہ پارٹی کا لیڈر منتخب کیا۔
سینیئر رہنما اور وزیر ایکناتھ شندے سبکدوش ہونے والی اسمبلی میں سینا کے موجودہ قانون ساز پارٹی کے رہنما تھے۔
ان کی امیدواری پارٹی رہنما آدتیہ ٹھاکرے نے تجویز کی تھی ، جن کا نام بھی اس عہدے کے لیے سنائی دے رہا تھا۔
پارٹی کے نومنتخب اراکین اسمبلی کی آج شیوسینا کے سربراہ ادھو ٹھاکرے کی صدارت میں دادر میں واقع سینا بھون میں میٹنگ ہوئی جس میں ایکناتھ شندے کو قانون ساز پارٹی کا لیڈر منتخب کیا گیا۔
مہاراشٹر میں حال ہی میں اختتام پذیر ہوا اسمبلی انتخابات بھارتیہ جنتا پارٹی (بی جے پی) اور شیوسینا نے مل کر لڑا تھا۔ بی جے پی کو 288رکنی اسمبلی میں 105سیٹوں پر جیت ملی تھی جبکہ شیوسینا 56پر کامیاب ہوئی تھی۔
انتخابی نتائج آئے ہوئے ایک ہفتہ سے زیادہ گزرجانے کے بعد دونوں جماعتوں میں ابھی وزیراعلی کے عہدہ پر کھینچ تان جاری ہے۔شیوسینا وزیراعلی کے عہدہ کے لیے 50-50 کے فارمولے پر بضد ہے جبکہ بی جے پی اس پر رضامند نہیں ہے۔
بدھ کو بی جے پی قانون ساز پارٹی کی میٹنگ میں دیویندر فڑنویس کو قانون ساز پارٹی کا لیڈر منتخب کیا گیا تھا۔
