اربن ڈیولپمنٹ پارلیمانی کمیٹی کے ممبر اور رکن پارلیمان امتیاز جلیل سمیت ایک وفد نے چند روز قبل کشمیر کا دورہ کیا تھا جس دوران انہیں پتہ چلا کہ گزشتہ دو برسوں سے ڈل جھیل کے تقریباً 5 ہزار شِکارا مالکان بیروزگار ہیں اس لیے اربن ڈیولپمنٹ پارلیمانی کمیٹی نے فیصلہ کیا ہے کہ شکارا مالکان کو اسمارٹ سٹی پروجیکٹ کے تحت فنڈ مہیا کیا جائے گا۔
اورنگ آباد میں ایک تقریب میں خطاب کے دوران امتیاز جلیل نے کہا کہ 'جموں و کشمیر کی ڈل جھیل میں تقریباً پانچ ہزار سے زائد ہاؤس بوٹ جنہیں مقامی سطح پر شکارا کہا جاتا ہے، پچھلے دو سال سے جھیل کے کنارے لگے ہوئے ہیں۔ ان ہاؤس بوٹس سے ہزاروں افراد کا روزگار وابستہ تھا لیکن انہیں حکومت کی جانب سے کوئی امداد نہیں ملی جس کے بعد اربن ڈیولپمنٹ کمیٹی نے فیصلہ کیا کہ ان شکارا مالکان کو اسمارٹ سٹی پروجیکٹ کے تحت فنڈ مہیا کرایا جائے۔
رکن پارلیمان امتیاز جلیل نے بتایا کہ 'جموں و کشمیر انتظامیہ اور دیگر حکام کی میٹنگ میں اس معاملے کو اسمارٹ سٹی پروجیکٹ میں شامل کیا گیا ہے اور اب ان ہاؤس بوٹ مالکان کو اسمارٹ سٹی پروجیکٹ کے تحت فنڈ فراہم کیا جائے گا۔
