شرد پوار نے نامہ نگاروں سے بات کرتے ہوئے کہا کہ پولیس کمشنر نے ان سے درخواست کی تھی کہ وہ ای ڈی دفتر نہ جائیں، جس کے پیش نظر انہوں نے ای ڈی دفتر جانے کا ارادہ ترک کردیا۔
این سی پی صدر نے کہا کہ عوام کو کسی طرح کی پریشانی نا ہو اسے توجہ میں رکھتے ہوئے پولیس کمشنر کی بات انہوں نے مان لی اور ای ڈی دفتر جانے کا ارادہ ترک کردیا۔
انہوں نے کہا کہ کل رات ای ڈی دفتر سے انہیں اطلاع ملی تھی کہ جب بھی ضرورت پڑےگی ای ڈی افسران انہیں مطلع کریں گے۔
پوار نے لوگوں سے اپیل کی ہے کہ وہ امن قائم رکھیں، انہوں نے کہا کہ وہ ای ڈی دفتر نہیں جائیں گے اور اب وہ پونے جا کر سیلاب متاثرہ علاقوں کا جائزہ لیں گے۔
واضح رہے کہ مہاراشٹر اسٹیٹ کو آپریٹو بینک معاملے میں ممبئی ہائی کورٹ میں عرضی داخل کی گئی تھی جس پر عدالت نے ای ڈی کو ملزمین کے خلاف معاملہ درج کرنے کا حکم دیاتھا۔
ای ڈی نے گزشتہ منگل کو اس معاملے میں شرد پوار ان بھتیجے اجیت پوار اور دیگر کے خلاف منی لانڈرنگ کا معاملہ درج کیا تھا۔
ای ڈی کی جانب سے درج انفورسمنٹ کیس انفارمیشن رپورٹ میں بینک کے سابق چیئرمین و مہاراشٹر کے سابق نائب وزیراعلی اجیت پوار کے علاوہ کو آپریٹو بینک کے 60 سے زائد سابق عہدیداروں کے نام شامل ہیں، یہ رپورٹ فرسٹ انفارمیشن رپورٹ (ایف آئی آر) کی طرح ہوتی ہے۔
