ریاست مہاراشٹر کے دارالحکومت ممبئی سے متصل مسلم اکثریتی شہر ممبرا کے اردو اسکولز کے طلبہ نے 'اردو ریلی' کا انعقاد کیا۔
ریلی کے ذریعہ طلبا نے دکانداروں سے درخواست کی کہ وہ اپنے سائن بورڈ پر اردو زبان کو بھی ترجیح دیں ساتھ ہی اپنے گھر و دفاتر میں اردو اخبار جاری کروائیں کیوںکہ یہ زبان محبت کی زبان ہے، امن و شانتی کی زبان ہے۔
ممبرا علاقہ میں محبان اردو کی جہدو جہد اور پٹیل اردو اسکول و عبداللہ پٹیل اسکول کی نگرانی میں آئندہ برس جنوری2020 میں پہلی بار اردو کتابی و تہذیبی میلہ کا انعقاد کا کیا جارہا ہے، جس کی تیاریوں کے سلسلہ میں ہر ہفتہ اردو اسکولز کے طلبا 'اردو ریلی' نکال رہے ہیں۔
اسی سلسلہ میں پٹیل اردو اسکول ممبرا دیوی روڈ کے طلبہ نے ممبرا علاقہ میں ایک شاندار ریلی نکالی جس میں طلبا نے ہاتھوں میں گلاب کا پھول و اردو کے اخبارات اٹھا رکھے تھے اور مسافرین، دوکانداروں ، سماجی و سیاسی رہنماو ں سے مطالبہ کر رہے تھے کہ اردو زبان کو بھی اپنے گھروں، دوکانوں اور دفاتر میں جگہ دیجئے۔
اس موقع پر مقامی کارپوریٹر یاسین قریشی نے کہا کہ اردو ماحول بنانے کے لئے آج ہم نے ریلی نکالی ہے۔
انہوں نے کہا کہ تھانے میونسپل کارپوریشن کی جانب سے اردو کے لئے ہمیشہ ہی تعاون پیش کیا جاتا رہا ہے اور ہم لوگ بھی اردو کی جہاں بات آتی ہے ٹی ایم سی میں آواز اٹھاتے ہیں۔
وہیں پٹیل اسکول کے پرنسپل عثمان سیخانی نے بتایا کہ آج کی ریلی میں آئندہ ہونے والے میلہ کو کامیاب بنانے اور بیداری لانے کے لئے نکالی گئی جس کے تحت ہم نے مطالبہ کیا ہے کہ اردو اخبارات کو خرید کر پڑھیں اور اپنے بچوں کو اردو اسکولز میں داخلہ دلائیں۔
اس میلہ کے ذمہدار سید زاہد نے بتایا کہ اردو اسکولز کے طلبا نے بھی اس ملک میں اعلیٰ مقام حاصل کیا ہے اور اردو اسکولز میں اعلیٰ تعلیم دی جاتی ہے اس لئے ہم صرف اردو میلہ نہیں لگانے جارہے بلکہ ہم میلہ کے ساتھ ساتھ اردو کو فروغ و ترویج کے لئے بھی ایک ماہ تک مہم چلا رہے ہیں۔
