اورنگ آباد :مراٹھا سماج کو او بی سی زمرے میں شامل کرنے کی مخالفت

ریاست مہاراشٹر اورنگ آباد میں او بی سی طبقات نے ڈویژنل کمشنر کو ایک میمورنڈم دیتے ہوئے کہا ہے کہ مراٹھا سماج کو او بی سی زمرے میں شامل نہیں کیا جائے ساتھ ہی او بی سی سماج کا مطالبہ ہے کہ ذات کی بنیاد پر او بی سی کا سروے کیا جائے۔

مراٹھا سماج کو او بی سی میں شامل کرنے کے معاملے کو لیکر او بی سی طبقات میں تشویش کی لہر ہے، او بی سی طبقات نے اسی بات کو لیکر ریاست مہاراشٹر کے اورنگ آباد میں ڈویژنل کمشنر آفس کے روبرو احتجاج کیا۔ ان کا مطالبہ ہے کہ او بی سی زمرے میں شامل تمام ذاتوں کا سروے ہونا چاہیئے ۔

اس موقع پر ضلع کلکٹر اور ڈیویژنل کمشنر کے توسط سے ریاستی اور مرکزی حکومت کو میمورنڈم دیا گیا۔ میمورنڈم میں مراٹھا سماج کو اوبی سی زمرے میں شامل نہ کرنے کی درخواست کی گئی ہے ۔

سکل او بی سی سماج کے رکن رام بھاؤ پینڈکر نے کہا کہ منڈل کمیشن کے حساب سے مہاراشٹر میں او بی سی زمرے میں 400 سے زائد طبقے شامل ہیں۔پورے ملک میں او بی سی زمرے کو 27 فیصد ریزرویشن ملتا ہے لیکن مہاراشٹر میں صرف 19 ایسے میں ایک اور طبقے کے شامل ہوجانے سے او بی سی زمرے میں آنے والے لوگوں کو مزید پریشانی کا سامناکرنا پڑے گا

انہوں نے مزید کہا کہ ہم مراٹھا سماج کو ریزرویشن دینے کے خلاف نہیں بلکہ انہیں او بی سی زمرے میں شامل کرنے کے خلاف ہیں۔