ممبئی: کورونا اور لاک ڈاؤن کے سبب فوٹوگرافر معاشی بحران کا شکار

گذشتہ دو برسوں سے کورونا وائرس اور لاک ڈاؤن کے سبب سیاحوں کی آمدورفت پوری طرح سے بند ہے۔ جس کے سبب ممبئی کے گیٹ وے آف انڈیا پر موجود فوٹو گرافر کو بڑی مشکلات کا سامنا کرنا پڑ رہا ہے، کیونکہ جب سیاح یہاں نہیں ہیں تو فوٹو گرافی کا یہ پیشہ بھی لاک ڈاؤن اور کورونا کی نذر ہوگیا۔

عالم یہ ہے کہ فوٹوگرافر معاشی بحران کا شکار ہو گئے ہیں اور وہ حکومت سے اس بات کی اپیل کررہے ہیں کہ ان کے بارے میں بھی کچھ سوچا جائے تاکہ ان کی روزی روٹی چل سکے۔

گیٹ وے آف انڈیا پر موجود فوٹو گرافر کی تعداد دو سو سے زیادہ ہے۔ یہ فوٹو گرافی کے ساتھ ساتھ یہاں تیسری آنکھ کا بھی کام کرتے ہیں۔ گیٹ وے کے احاطے میں یہ تاج کے آس پاس جہاں ان کی موجودگی ہے، ان جگہوں پر بطور سکیورٹی اہلکار کا بھی کام یہی کرتے ہیں۔ 26/11 دہشت گردانہ حملوں کے بعد گیٹ وے آف انڈیا اور اطراف کے علاقوں کو حساس علاقوں میں شمار کیا جانے لگا۔ اس وقت ممبئی پولیس کو فوٹو گرافروں کی اشد ضرورت محسوس ہوئی۔

اس وقت کے سینیئر آئی پی ایس افسر کرشن پرکاش نے اس طرح کا ڈریس اور آئی کارڈ جاری کیا، لیکن وقت کے ساتھ ساتھ سب کچھ بدل گیا اور فوٹو گرافروں کا آج یہ حال ہے کہ دن میں 100 روپیے بھی کمانا مشکل ہوگیا ہے۔