ممبئی میں آج ملک بھر کے دستکاروں اور گھریلوصنعت سے وابستہ فن کاروں کے ساتھ ساتھ ذائقہ دار لذیذ کھانوں کے خانساموں کے تعارف کے لیے منعقد ہنر ہاٹ میں اس بار اردو سائن بورڈ نہ ہونے پر شدید ناراضگی اظہار کرنے کے بعد مرکزی وزیر برائے اقلیتی امور مختار عباس نقوی نے فوری طور پر منتظمین کو اردو بورڈ نصب کرنے کی ہدایت دی۔
دراصل اردو اخبارات سے وابستہ صحافیوں اور کئی اردو داں حضرات نے وزیر موصوف کی توجہ اس جانب مبذول کرائی اوراحتجاج کیا، سنئیر صحافی سرفراز آرزو نے انہیں مخاطب کرتے ہوئے کہا کہ 'ہنرہاٹ میں 90 فیصد دستکار اقلیتی فرقے سے تعلق رکھتے ہیں لیکن ان کی اپنی زبان کا ایک بھی بورڈ نصب نہیں کیا گیا۔
وزیر موصوف نے بڑے غور سے ان کی باتیں سنیں اور منتظمین اور ذمہ دار افسران کو فوری طور پر اردو بورڈ لگانے کی ہدایت دی اور یقین دلایا کہ مستقبل میں اس پر عمل کیا جائیگا۔
