نواب ملک نے کہا کہ 'ایک نجی نیوز چینل میں بحث کے دوران ان کے ذریعہ کی گئی باتوں میں ترمیم کر کے بی جے پی آئی ٹی سیل کے کارکنان انہیں سوشل سائٹس پر نشانہ بنا رہے ہیں، یہی نہیں انہوں نے مزید الزام عائد کیا کہ پچھلی بی جے پی حکومت کے دوران بھی انہیں اور ان کے اہل خانہ کو پریشان کیا گیا تھا۔
نواب ملک نے اناؤ جنسی زیادتی معاملے کے بارے میں کہا کہ جس طرح سے متاثرہ کی میڈیکل رپورٹ میں کہا گیا کہ اس کی موت دل کا دورہ پڑنے سے ہوئی ہے، یہ انتظامیہ پر سوالیہ نشان کھڑا کرتی ہیں کیونکہ کئی معاملوں میں انتظامیہ ملزمین کے ساتھ شانہ بشانہ نظر آتی ہے، تو ممکن ہے کہ اس معاملے میں بھی ایسا ہی ہوا ہوگا۔
انہوں نے کہا کہ 'تلنگانہ پولیس نے جن ملزمین کر گولی ماری ہے وہ انصاف نہیں ہے، انصاف کرنا کورٹ کا کام ہے اس طرح کے معاملوں میں فاسٹ ٹریک کورٹ کے ذریعہ معاملے میں جلد سے جلد ختم کر کے ملزمین کو کیفر کردار تک پہچانا چاہیے۔
اس کے علاوہ نواب ملک نے بی جے پی پر الزام عائد کرتے ہوئے کہا کہ 'جس آبپاشی بدعنوانی میں اجیت پور نے اپنے عہدے سے استعفی دیا تھا اس معاملے میں اینٹی کرپشن بیورو نے کلین چٹ دی ہے اس سے بی جے پی کے جھوٹ کا پلندہ پوری طرح بے نقاب ہو گیا ہے۔
انہوں نے کہا کہ بی جے پی پچھلے 7 برسوں سے این سی پی کے رہنماؤن کو نشانہ بنا رہی ہے اور جس 70 ہزار کروڑ کی بدعنوانی کے نام پر گزشتہ 7 برسوں سے اجیت پوار کو نشانہ بنا رہی ہے اتنی رقم اس محکمہ کے لیےکبھی مختص ہی نہیں کی گئی لیکن بی جے پی کچھ لوگوں کی مدد سے معاملے کو کورٹ تک لے گئی جہاں انھیں ناکامی ہاتھ لگی کیونکہ ای سی بی رپورٹ میں سب کچھ صاف ہو گیا ہے۔
