ریاست مہاراشٹر کے مسلم اکثریتی شہر مالیگاؤں میں گزشتہ روز دوپہر ایک بجے کے درمیان شہر کے عائشہ نگر قبرستان میں ایک نا معلوم بزرگ کی لاش کی تدفین کی گئی۔
ذرائع سے ملی جانکاری کے مطابق بزرگ کی عمر 65 سال بتائی گئی جبکہ نام و پتہ معلوم نہیں ہوسکا۔
بتایا جارہا ہے کہ بزرگ کی لاش موسم پل کے نیچے پڑی ہوئی تھی۔ایک دن کے بعد ایک نا معلوم شخص نے اس کی اطلاع سٹی پولیس کو دی۔
بعد ازاں پولیس نے اس شخص کو شہر کے جنرل ہسپتال میں منتقل کیا اور تمام قانونی مراحل کی تکمیل کے بعد پولیس نے ایم ایم سی میں اس بات کی جانکاری دی۔
مقامی پولیس نے سماجی کارکن شفیق شیخ کو بلایا اور اسلامی طریقہ سے انہیں شہر کے عائشہ نگر قبرستان میں سپرد خاک کیا گیا۔ اس معاملے میں سماجی کارکن شفیق نے ای ٹی وی بھارت کے نمائندے کو بتایا کہ شہر میں لاوارث لاش ملنے کا یہ دوسرا واقعہ ہے۔ لہذا شہر کے سرکردہ افراد کو اس معاملے میں آگے آنے کی ضرورت ہے۔
انہوں نے سردی کے موسم کا ذکر کرتے ہوئے کہا کہ آئندہ دنوں مزید سردی ہوگی۔ ایسے میں جو غرباء سڑک اور فٹ پاتھ پر زندگی گذارتے ہیں۔انہیں مزید دشواریاں درپیش ہونگی۔اور ایسے میں اموات کی تعداد میں اضافہ بھی ہوسکتا ہے۔
